Brazili shprehu “shqetësim të thellë” në ditën e parë të ndalimit të importit të mishit të pulës dhe viçit nga Bashkimi Evropian (BE), pasi unioni kërkoi garanci për përputhjen me rregullat sanitare. Komisioni Evropian e akuzoi Brazilin se nuk ka ofruar garanci të mjaftueshme se produktet e tij janë në përputhje me rregullat evropiane kundër përdorimit të tepruar të antibiotikëve në blegtori.
“Brazili pret fuqishëm që dialogu teknik në vazhdim të mundësojë një zgjidhje të shpejtë, objektive, transparente dhe të bazuar në shkencë”, njoftuan ministritë braziliane të Punëve të Jashtme dhe të Bujqësisë.
Ata shpresojnë që një vendim i tillë “të njohë në mënyrë të përshtatshme garancitë e ofruara nga vendi”.
BE-ja dëshiron të tregojë vigjilencë pasi u kritikua ashpër nga sektori bujqësor dhe Franca për marrëveshjen e tregtisë së lirë, të nënshkruar në janar 2026 me vendet e Amerikës së Jugut të Mercosur-it: Brazilin, Argjentinën, Uruguain dhe Paraguain.
Brazili u hoq në maj nga lista e vendeve që respektojnë rregullat e BE-së për përdorimin intensiv të antibiotikëve në blegtori, nën presionin e sektorit pas nënshkrimit të kësaj marrëveshjeje.
Në vitin 2025, Brazili ishte eksportuesi i dytë më i madh i mishit të viçit në BE, me mbi 92 mijë tonë produkte të mishit të viçit, me vlerë mbi 713 milionë euro.