Një diamant i madh blu është zbuluar në një minierë në Afrikën e Jugut, për të cilin ekspertët besojnë se mund të arrijë deri në 30 milionë paund në ankand.
Guri i papërpunuar, i gjetur në minierën Cullinan, i ngjan formës së Afrikës dhe vlerësohet në afro 42 karatë.
Diamantët blu janë jashtëzakonisht të rrallë dhe formohen vetëm në thellësi ekstreme, nga 600 deri në 700 kilometra nën sipërfaqe, përpara se të afrohen me sipërfaqen nga aktiviteti vullkanik.
Ngjyrën e tyre karakteristike e marrin nga gjurmë të borit, i cili ndihmon në thithjen e dritës së kuqe, portokalli dhe të verdhë, duke krijuar një nuancë shumë të çmuar blu të hapur ose gri.
Më pak se 0.1 për qind e diamantëve natyrorë klasifikohen si diamante blu, të njohur teknikisht si tipi IIb.
Ekspertët e gurëve të çmuar janë ende duke e vlerësuar gurin përpara se të vendosin se si do të pritet.
Kompania Petra Diamonds, e cila operon minierën rreth 32 km në lindje të Pretorias, tha se kishte “nxjerrë një diamant blu tip IIb prej 41.82 karatësh, me cilësi në dukje të jashtëzakonshme si për nga ngjyra ashtu edhe për nga pastërtia, në minierën Cullinan në Afrikën e Jugut”.
Në një deklaratë thuhej se kompania ishte “në proces analizimi të gurit dhe përcaktimi të metodës së preferuar të shitjes së tij”.
Miniera është prodhuesi më i rëndësishëm në botë i diamantëve blu dhe është gjithashtu burimi i diamantit të famshëm Cullinan, guri i papërpunuar me cilësi gurë të çmuar më i madh që është gjetur ndonjëherë.
Ai diamant, i zbuluar në vitin 1905, u pre në nëntë gurë të veçantë, disa prej të cilëve sot janë pjesë e Bizhuterive të Kurorës Britanike.
Gregory Katz, tregtar diamantësh në Johanesburg, i tha medias News24 se, në varësi të prerjes përfundimtare dhe cilësisë, diamanti blu i sapogjetur mund të shitet për një shumë nga 30 deri në 40 milionë dollarë.
Prerësit do të synojnë të maksimizojnë madhësinë e gurit, por diamanti i përfunduar dhe i lustruar do të jetë dukshëm më i vogël se guri i papërpunuar origjinal.
“Nuk ka shumë dyshim se është një zbulim i rëndësishëm,” tha ai.
Zbulimi vjen pas disa vitesh të vështira për industrinë e nxjerrjes së diamantëve, pasi çmimet kanë rënë.
Çmimet pësuan rënie pas rritjes së shpenzimeve gjatë pandemisë, ndërsa popullariteti në rritje i diamantëve të prodhuar në laborator, që janë më të lirë se ata natyrorë, ka ushtruar presion shtesë mbi tregun.
The post Diamanti blu me vlerë 30 milionë paund gjendet në Afrikën e Jugut appeared first on Alsat.