Lideri opozitar iranian në ekzil, Reza Pahlavi ka publikuar një mesazh dramatik në rrjetet sociale, në të cilin pretendon se me vdekjen e Udhëheqësit Suprem të Iranit, Ali Khamenei, “efektivisht përfundon” epoka e Republikës Islamike.
Në fjalimin drejtuar “bashkëkombësve të tij”, Pahlavi e quajti Khamenein “Zahaku gjakatar i kohës sonë”, duke iu referuar figurës mitologjike persiane, dhe e akuzoi për vdekjen e “dhjetëra mijëra bijve dhe bijave më të guximshëm të Iranit”.
Ai vlerësoi se me largimin e Udhëheqësit Suprem, sistemi shtetëror i vendosur pas Revolucionit Islamik të vitit 1979 hyn në fazën e tij përfundimtare.
Thirrje drejtuar forcave të sigurisë
Pahlavi u bëri apel të drejtpërdrejtë strukturave ushtarake, të sigurisë dhe policore në vend, duke paralajmëruar se çdo përpjekje për të ruajtur, siç e quajti ai, “një regjim në shpërbërje” është e destinuar të dështojë.
“Kjo është shansi juaj i fundit për t’iu bashkuar popullit dhe për të ndihmuar në një tranzicion të qëndrueshëm të Iranit drejt një të ardhmeje të lirë dhe të begatë,” thuhet në deklaratën e tij. Ai shtoi se çdo pasardhës i mundshëm i Khameneit do të ishte i privuar nga legjitimiteti dhe do të mbante përgjegjësi për krimet e pretenduara të regjimit.
“Fillimi i një feste të madhe kombëtare”
Në mesazhin e tij, Pahlavi shprehu ngushëllime për familjet e të vrarëve në protestat antiqeveritare dhe represionet politike, duke theksuar se vdekja e Khameneit “nuk mund ta kthejë gjakun e derdhur”, por mund të përfaqësojë “një balsam për zemrat e djegura të familjeve të pikëlluara”.
Ai deklaroi se kjo përbën, sipas tij, “fillimin e një feste të madhe kombëtare”, por paralajmëroi se “rruga nuk ka përfunduar”, duke bërë thirrje për vigjilencë dhe gatishmëri për “prani masive dhe vendimtare në rrugë” në të ardhmen e afërt.
Reza Pahlavi, djali i shahut të fundit të Iranit, prej vitesh jeton në mërgim dhe është pozicionuar si simbol i një alternative laike dhe demokratike ndaj sistemit aktual në Teheran. Ai rregullisht bën thirrje për tranzicion paqësor dhe vendosjen e një rendi demokratik në Iran.
Aktualisht nuk ka konfirmim të pavarur nga autoritetet iraniane për pretendimet e bëra në deklaratën e tij. Institucionet zyrtare në Teheran ende nuk kanë dalë me një njoftim lidhur me gjendjen e Udhëheqësit Suprem.
Situata mbetet e paqartë, ndërsa pasojat e mundshme politike mund të kenë ndikim të rëndësishëm në stabilitetin e brendshëm të Iranit dhe në kontekstin më të gjerë rajonal të Lindjes së Mesme.