Hekurudhat e Maqedonisë funksionojnë mbi hekurudha të vjetra më shumë se gjysmë shekulli, me shina të vendosura që në vitet 60, trena që lëvizin me 10 km/h dhe një rënie dramatike të numrit të të punësuarve – kjo tregon thellësinë e viteve të neglizhencës, thotë mes tjerash drejtori i Hekurudhave të Maqedonisë – Transport, Sinishaa Ivanovski, në një intervistë për Radio Evropën e Lirë. Ai thotë se qytetarët po i largohen këtij lloj transporti për shkak se nuk është efikas.
“Si dallim, do të theksoja se fusha e punës sime është infrastruktura hekurudhore, pra linjat hekurudhore, sinjalizimi rrugor dhe menaxhimi i trafikut në hekurudha. Hekurudhat janë në gjendje të mjerueshme. Shpesh dëgjojmë se një tren lëviz me 10 kilometra në orë, me 20 kilometra në orë, madje edhe ai që lëviz me 10 kilometra në orë ka vetëm që të ketë trenat aty. Këto janë disa segmente të veçanta në të gjithë vendin. Aktualisht po bëjmë disa riparime në pjesë të hekurudhave, ku duke hequr shinat e vjetra, shohim se ato janë vendosur në vitin 1963 ose 1969, që do të thotë se janë mbi 55 vjet të vjetra. Kjo nuk do të thotë se një qeveri e caktuar nuk është kujdesur, por fakti që kemi arritur në këtë gjendje tregon se për rreth 30 vite fokusi tek hekurudhat ka qenë me të vërtetë në nivel të ulët. Një tregues tjetër, më parë dy ndërmarrjet publike hekurudhore, Infrastrukturë dhe Transporti, kishin rreth 14.000 të punësuar. Sot, të dy ndërmarrjet së bashku kanë nën 1.300 të punësuar, që do të thotë ka një ulje prej rreth 90 për qind. Ka një numër jashtëzakonisht të madh të largimeve të stafit profesional, atij që është me të vërtetë i rëndësishëm për ne, dhe kjo është një luftë e përditshme për të rimarrë ekipet në dy ndërmarrjet dhe për të stabilizuar infrastrukturën hekurudhore dhe transportin”, theksoi Ivanovski.