Ministria e Punëve të Jashtme të Kinës sot kumtoi se do ta zgjerojë politikën e regjimit pa viza në nëntë vende të tjera, përfshirë Maqedoninë e Veriut.
Midis 30 nëntorit 2024 dhe 31 dhjetorit 2025, politika pa viza do të zbatohet për mbajtësit e zakonshëm të pasaportave edhe nga Bullgaria, Rumania, Kroacia, Mali i Zi, Malta, Estonia, Letonia dhe Japonia, kumtoi në konferencë për shtyp në Pekin, zëdhënësi i MPJ-së së RP Kina, Lin Xhijan.
Përveç kësaj, Kina do të zgjasë gjithashtu periudhën e qëndrimit pa viza nga 15 deri në 30 ditë, transmetoi televizioni shtetëror CCTV.
Duke filluar nga 30 nëntori 2024, mbajtësit e pasaportave të zakonshme nga 38 vende, duke përfshirë nëntë vendet e reja të shtuara, do të mund të hyjnë në Kinë pa vizë për biznes, turizëm, vizitë të afërmve dhe miqve, shkëmbim vizitash dhe tranzit, jo më shumë se 30 ditë.