Republika Demokratike e Kongos ka bërë të ditur të martën se numri i vdekjeve të konfirmuara nga Ebola ka arritur në 2,011.
Të dhënat më të fundit nga Instituti i Shëndetit Publik të Kongos, të siguruara nga Reuters, flasin gjithashtu për 4,381 raste të konfirmuara në pesë provinca.
Zbulimi i vonuar i rasteve, konflikti dhe shërbimet shëndetësore të mbingarkuara kanë ndihmuar që virusi të përhapet më shpejt se në shpërthimet e mëparshme.
Shpërthimi aktual, i 17-ti në Kongo, shkaktohet nga lloji Bundibugyo i virusit Ebola, për të cilin nuk ka vaksina apo trajtime të miratuara.
Organizata Botërore e Shëndetësisë e ka shpallur shpërthimin, i cili ka shkaktuar raste edhe në Ugandën fqinje, një emergjencë shëndetësore me rëndësi ndërkombëtare.
Një studim i botuar muajin e kaluar në revistën “Science” zbuloi se transmetimi mund të ketë nisur në janar ose edhe më herët në provincën Ituri, duke identifikuar më shumë se 500 raste të dyshuara nga mesi i janarit deri më 15 maj.
Mungesat e pajisjeve dhe furnizimeve mjekësore, si dhe pasiguria në zonat e prekura, kanë komplikuar përpjekjet për gjurmimin e kontakteve, izolimin e pacientëve dhe frenimin e përhapjes së virusit.
Të dhënat e qeverisë kongoleze tregojnë se vetëm shpërthimi i Ebolës në Afrikën Perëndimore gjatë viteve 2014–2016 ishte më i madh, me 28,616 raste dhe 11,310 vdekje të regjistruara në Guine, Liberi dhe Sierra Leone, sipas Organizatës Botërore të Shëndetësisë.