Ministri i Transformimit Dixhital, Stefan Andonovski, mori pjesë në takimin ministror ndërmjet Komisionit Evropian dhe ministrave të Ballkanit Perëndimor, kushtuar nismës “Roaming si në shtëpi” (Roaming Like Home), e cila synon t’u mundësojë qytetarëve përdorimin e shërbimeve mobile në vendet e Bashkimit Evropian me tarifa të njëjta si në vendin e tyre.
Gjatë takimit të zhvilluar përmes videokonferencës, u diskutuan hapat e ardhshëm për integrimin e vendeve të Ballkanit Perëndimor në këtë regjim, si dhe harmonizimi i legjislacionit kombëtar me standardet evropiane.
Andonovski theksoi se kjo iniciativë është një nga prioritetet kryesore të Qeverisë dhe Ministrisë së Transformimit Dixhital, duke e cilësuar atë si një përfitim të drejtpërdrejtë për qytetarët, bizneset, studentët dhe turistët.
“Roaming Like Home nuk është vetëm një proces teknik apo rregullator. Ai sjell përfitime konkrete për qytetarët tanë, ul kostot e komunikimit dhe afron vendin me tregun e vetëm dixhital të Bashkimit Evropian”, deklaroi ministri.
Sipas tij, zbatimi i kësaj nisme do të mundësojë komunikim më të lehtë, udhëtime më të lira dhe bashkëpunim më të madh ekonomik, ndërsa në aspektin strategjik përfaqëson një hap të rëndësishëm drejt integrimit evropian.
Andonovski bëri të ditur gjithashtu se Ministria e Transformimit Dixhital ka përgatitur që në gusht të vitit 2025 një Plan Veprimi gjithëpërfshirës, i cili përcakton masat, institucionet përgjegjëse dhe afatet për harmonizimin e legjislacionit kombëtar me rregullat e Bashkimit Evropian në fushën e roamingut dhe komunikimeve elektronike.