Nga 1 shtatori pritet mbyllja e 8 shkollave fillore rajonale në Strugë

Gazetar: Miki Trajkovski

Nga 1 shtatori, 8 nga gjithsej 24 shkolla fillore rajonale në komunën e Strugës pritet të mbyllen, përkatësisht të vihen në gjendje pezullimi dhe të bashkohen me shkollat qendrore, mëson Alsat. Sipas planit, nxënësit do të vazhdojnë mësimin në shkolla më të mëdha. Nxënësit nga Radozhda do të udhëtojnë drejt shkollës qendrore “Josip Broz Tito” në Strugë, ndërsa ata nga Kalishti do të ndjekin mësimin në shkollën “Vëllezërit Milladinov”. Nxënësit nga fshatrat Xhepin dhe Poum do të vazhdojnë mësimin në Koroshishtë, përkatësisht në Dellogozhdë. Shkolla në fshatin Nerez ka tre muaj që është mbyllur, ndërsa në shkollën “Ashim Agushi” në Radolishtë deri tani janë mbyllur dy paralele, ndërsa deri në fund të vitit shkollor 2026–2027 do të racionalizohen edhe katër të tjera.

“Deri në Veleshtë, Dobovjan është shumë afër. Atje janë shtatë fëmijë që mund të qëndrojnë në një paralele të kombinuar, por mund të shkojnë edhe në Veleshtë. Gjithashtu, në rastin e shkollës ‘Orhan Xhemaili’, fshati Tatesh, Bogovicë dhe Tateshi i Poshtëm konsiderohen si shkolla rajonale që janë në rrezik. Një opsion është që nxënësit nga Bogovica të shkojnë në Misllodezhdë, ndërsa ata nga Tateshi i Poshtëm të shkojnë në Tatesh. Këto gjithashtu konsiderohen si shkolla rajonale të shkollës ‘Nuri Mazari’ në Dellogozhdë. Përveç shkollave rajonale, në Oktis duhet të menaxhohen klasat e larta së bashku me shkollën në Belicë, si dhe mësimi në gjuhën shqipe”, deklaroi Xhemi Hajredini – Sektori i arsimit, komuna e Strugës.

Sipas Hajredinit, plani është që të mbyllen edhe katër shkolla fillore qendrore në fshatrat Podgorcë, Tatesh, Jabllanicë dhe Drasllajcë dhe ato të bashkohen me shkollat qendrore më të afërta, me ç’rast numri i tyre nga 12 do të reduktohet në 8. Këto shkolla nuk i plotësojnë më kushtet për të funksionuar si të tilla, pasi nuk kanë numër të mjaftueshëm nxënësish.

“Nuk do të ketë largime nga puna për personelin që ka vendim pune dhe për kuadrin profesional. Ndoshta do të ketë racionalizim vetëm te kuadri joadekuat, përkatësisht te ata që nuk kanë vendim pune dhe nuk janë të kualifikuar në mënyrë të përshtatshme. Të tjerët do të trajtohen si asistentë arsimorë, ndërsa me hapjen e kopshteve të reja dhe me pensionimin e punonjësve më të vjetër do të krijohen mundësi për angazhimin e tyre. Kështu, do të mbahen të gjithë ata që kanë vendim pune”, tha Xhemi Hajredini – Sektori i arsimit, komuna e Strugës.

Që propozimi i autoriteteve lokale të realizohet, duhet të marrë dritën jeshile nga Këshilli i komunës. Gjithashtu do të mbahen takime publike me banorët e vendbanimeve, drejtorët dhe mësimdhënësit. Me këtë racionalizim pritet të kursehen mjete financiare. Në të kundërtën, sipas Hajredinit, nëse plani nuk realizohet, komunën e pret kolaps financiar./Alsat.mk.