Pas debatit mbikëqyrës mbi ndotjen, Komisioni i Shëndetësisë nxori përfundime dhe rekomandime për ballafaqim me gjendjen në vend. Kryetarja e Komisionit, Rashela Mizrahi, tha se gjatë seancës së debatit u identifikuan shumë mospërputhje dhe u identifikua nevoja për një strategji shtetërore me masa afatgjata për përmirësimin e përhershëm të ajrit.
“Rekomandohet që Qeveria, ministritë kompetente, komunat dhe Qyteti i Shkupit të krijojnë masa dhe zgjidhje bazuar në të dhëna dhe matje relevante nga institucionet përkatëse dhe të përdoren metoda të dëshmuara shkencërisht dhe teknikisht për analizimin dhe zvogëlimin e ndotjes. Komisioni rekomandon që komunat dhe Qyteti i Shkupit të zhvillojnë plane për menaxhimin e ajrit mjedisor me një orar të përcaktuar qartë për zbatimin e masave të përfshira në plan” tha Rashela Mizrahi.