Policia e Shtetit në Shqipëri ka rritur masat e gatishmërisë për shkak të situatës së rënduar atmosferike që ka përfshirë disa zona të vendit.
Shërbimet e Policive Vendore, Patrullat e Përgjithshme dhe forcat “Shqiponja” kanë ndërhyrë në ndihmë të banorëve kudo ku është kërkuar asistencë, ndërsa në zonat më të prekura janë angazhuar edhe Forcat Kombëtare të Sigurisë dhe Delta Forca.
Në qarkun e Beratit, shërbimet e Komisariatit të Policisë Berat, në bashkëpunim me emergjencat civile të Bashkisë Dimal, kanë evakuuar pesë persona nga fshatrat Çiflik dhe Arrëz.
Mes tyre ishte edhe një 100-vjeçare nga fshati Çiflik, e cila u nxor në kohë të sigurt nga zona e rrezikut.
Ndërhyrje të shumta janë kryer edhe në Devoll, ku reshjet e dendura kanë shkaktuar përmbytje në fshatin Progër. Policia e Devollit ka asistuar banorët e prekur dhe prej mëngjesit vijon kërkimet për një 75-vjeçare me probleme të shëndetit mendor, e zhdukur nga banesa dhe e dyshuar se mund të jetë marrë nga rrjedha e ujit.
Paralelisht, Policia Rrugore ka shtuar prezencën në të gjitha akset kombëtare për të parandaluar aksidentet dhe për të ndihmuar drejtuesit e mjeteve në rast nevoje.
Specialistët e Policisë në terren mbajnë kontakte të vazhdueshme me kryetarët e fshatrave dhe administratorët lokalë për të garantuar ndërhyrjen e shpejtë në situata emergjente, ndërsa Sallat Operative janë përforcuar për t’u përgjigjur në kohë reale telefonatave të qytetarëve.
Policia e Shtetit njofton se mbetet në gatishmëri të plotë dhe po koordinon veprimet me Emergjencat Civile. Qytetarët që kanë nevojë për ndihmë mund të kontaktojnë në numrin falas 112.
The post Përmbytjet godasin Shqipërinë, angazhohen edhe Forcat Kombëtare të Sigurisë dhe Delta Forca appeared first on Alsat.