Polonia ka instaluar grupin e parë të një sistemi artilerie mbrojtëse në një kullë të re vëzhgimi në Ozierany, pranë kufirit polako-bjellorus, si pjesë e përpjekjeve për të forcuar sigurinë kundër kërcënimeve nga mjetet ajrore pa pilot, thanë zyrtarët të martën.
“Është një kullë e veçantë sepse në këtë kullë po instalohet grupi i parë i sistemit të artilerisë që do të mbrojë kufirin polak. Në janar, ky grup do të vihet në funksion,” tha ministri i Brendshëm dhe Administratës, Marcin Kierwinski, gjatë një konference për shtyp në Ozierany.
Kierwinski dhe kryeministri Donald Tusk vizituan gjithashtu të martën pikën e Rojës Kufitare në Bobrowniki, si pjesë e fazës më të fundit të forcimit të sigurisë përgjatë kufirit polako-bjellorus.
Kulla në Ozierany është një nga pesë struktura të tilla të ndërtuara muajt e fundit. Ato janë instaluar përgjatë lumenjve Svisloch dhe Istoczanka, si edhe në zona të tjera. Kostoja totale e investimit ishte rreth 47 milionë zloty, 11.1 milionë euro.
Më shumë se 4,000 ushtarë, së bashku me disa qindra efektivë të Rojës Kufitare dhe policisë, do ta kalojnë Natën e Krishtlindjes në detyrë, tha Tusk.
“Në total, mbi 6,000 persona do ta kalojnë Natën e Krishtlindjes pikërisht në kufi. Të gjithë do ta dimë se falë tyre, të tjerët mund t’i kalojnë këto Krishtlindje të sigurt në shtëpitë e tyre”, u shpreh ai.
Kierwinski foli gjithashtu për rritjen e sigurisë kufitare, duke thënë se “pothuajse 30,000 tentativa për të kaluar ilegalisht kufirin polak” janë parandaluar. “Kjo tregon se me çfarë sfide po përballemi,” tha ai.
Megjithatë, aktivistët që vazhdojnë të ofrojnë ndihmë humanitare në kufirin polako-bjellorus, si edhe organizatat e të drejtave të njeriut, thonë se ndonëse tani ka më pak thirrje nga migrantët për ndihmë, situata humanitare mbetet e vështirë.