Një plan ambicioz për ndërtimin e një linje hekurudhore me shpejtësi të lartë ka ndezur debat në Mbretërinë e Bashkuar dhe Irlandë. Projekti i quajtur The Loop synon të shtrihet në rreth 740 milje dhe të lidhë nëntë qytete kryesore përmes trenave që do të arrijnë deri në 300 milje në orë. Sipas propozimit, linja do të përfshijë Dublinin, Belfastin, Glasgoun, Edinburgun, Newcastle, Leeds, Manchester, Liverpool dhe qytetin uellsian Bangor. Nëse realizohet, distanca mes këtyre qendrave urbane do të përshkohet në më pak se 90 minuta, duke krijuar një rrjet të ri ekonomik në veri të Britanisë.
Ideja është prezantuar nga arkitekti Chris Williamson, president i Royal Institute for British Architects, i cili thekson se vendit i mungon vizioni i projekteve madhore si në epokën industriale. Ai argumenton se Britania duhet të guxojë me mega-projekte për të konkurruar me zhvillimet e shpejta në Azi dhe Lindjen e Mesme. Projekti, me një kosto të parashikuar prej 130 miliardë paundësh, do të kalojë dy herë Detin Irlandez, duke lidhur Bangor me Dublinin dhe Belfastin me Glasgoun. Trenat do të lëvizin mbi një viadukt të ngritur, çka sipas projektuesve do të minimizojë ndikimin në terren dhe do ta bëjë më të lehtë zbatimin teknik.
Nëse ndërtohet, The Loop do të bëhej linja e tretë me shpejtësi të lartë në vend, pas linjës që lidh Londrën me Tunelin e Kanalit dhe projektit HS2, i cili ka hasur vonesa dhe polemika për shkak të kostove të larta dhe reduktimeve në shtrirje. Ndërsa mbështetësit e konsiderojnë një hap drejt krijimit të një super-qendre ekonomike veriore, kritikët ngrenë pikëpyetje mbi realizueshmërinë financiare dhe vullnetin politik për ta çuar përpara një projekt të tillë kolosal.
The post Projekti 130 miliardë paund që synon të bashkojë Britaninë dhe Irlandën! appeared first on Alsat.