Ushtria amerikane ka njoftuar se ka goditur një anije në lindje të Oqeanit Paqësor, ku si pasojë janë vrarë dy persona. Ky është sulmi më i fundit i këtij lloji, i cili është dënuar nga grupet për të drejtat e njeriut si “vrasje jashtëgjyqësore”, ndërsa Uashingtoni e cilëson si operacion të drejtuar kundër “narkoterroristëve”.
Komanda Jugore e Shteteve të Bashkuara (U.S. Southern Command) pretendon se anija e goditur të premten drejtohej nga “organizata të përcaktuara terroriste”, të cilat nuk janë identifikuar publikisht. Sipas njoftimit, asnjë pjesëtar i forcave amerikane nuk është lënduar, ndërsa personat e vrarë janë përshkruar si “narkoterroristë meshkuj”, pa dhënë detaje të mëtejshme.
“Shërbimet e inteligjencës kanë konfirmuar se anija po lëvizte në rrugë të njohura të kontrabandës së narkotikëve në Paqësorin lindor dhe ishte e përfshirë në operacione të trafikut të drogës”, thuhet në njoftimin e Komandës Jugore në platformën X. Ata publikuan gjithashtu një video 16-sekondëshe të incidentit.
Ushtria amerikane ka kryer disa sulme të ngjashme në Paqësorin lindor gjatë javëve të fundit. Sipas raportimeve, që nga shtatori në këto operacione janë vrarë më shumë se 170 persona.
Ndërkohë, organizata për të drejtat e njeriut dhe ekspertë, si në SHBA ashtu edhe ndërkombëtarisht, kanë vënë në pikëpyetje ligjshmërinë e këtyre sulmeve. Human Rights Watch dhe Amnesty International i kanë cilësuar ato si “vrasje të paligjshme jashtëgjyqësore”.
Unioni Amerikan për Liritë Civile (ACLU) ka hedhur poshtë pretendimet e administratës Trump, duke i quajtur ato “pretendime të pabazuara që përhapin frikë”.