Gazetare: Ajnur Bafqari
SHBA-ja dhe Irani kanë pretenduar të dyja se kanë qëlluar forcat e njëra-tjetrës në Ngushticën e Hormuzit. Ushtria amerikane pretendoi se helikopterët e saj kishin fundosur gjashtë anije të vogla që synonin anijet civile ndërsa po lëviznin për të rihapur ngushticën. Ata gjithashtu pretenduan se dy anije tregtare me flamur amerikan kishin kaluar me sukses ngushticën të hënën përmes një kalimi pa mina iraniane.
Sekretari i Mbrojtjes së SHBA-së, tha se forcat preferojnë që përpjekja e tyre e re për të udhëhequr anijet e bllokuara përmes Ngushticës së Hormuzit të jetë paqësore, por janë gati nëse ndryshojnë nevojat.
“Projekti Liria është mbrojtës në natyrë, i përqendruar në fushëveprim dhe i përkohshëm në kohëzgjatje, me një mision që mbron anijet tregtare të pafajshme nga agresioni iranian. Forcat amerikane nuk do të kenë nevojë të hyjnë në ujërat ose hapësirën ajrore iraniane. Nuk është e nevojshme. Ne nuk kërkojmë luftë. Por Iranit gjithashtu nuk mund t’i lejohet të bllokojë vendet e pafajshme dhe mallrat e tyre nga një rrugë ujore ndërkombëtare,” theksoi sekretari i mbrojtjes së SHBA-së, Pete Hegseth.
Ndërkohë Presidenti i Shteteve të Bashkuara, Donald Trump, kërcënoi se Irani do të, siç tha ai,fshihet nga faqja e dheut, nëse sulmon anijet amerikane që përpiqen të rihapin Ngushticën.
Është e paqartë se çfarë do të pasojë pas një përpjekjeje amerikane për t’i dhënë fund kontrollit të Iranit në ngushticë duke krijuar një zonë sigurie. Një zyrtar iranian akuzoi SHBA-në se po minon sigurinë rajonale me këtë përpjekje dhe paralajmëroi se Irani do të përgjigjet.
“Brenda kësaj zone të shënuar, çdo anije që dëshiron të kalojë, duhet ta bëjë këtë me lejen e forcave të armatosura të Republikës Islamike në mënyrë që të jetë e sigurt. Çdo anije që i përket një armiku armiqësor që përpiqet të kalojë do të trajtohet me vendosmëri,” tha zëvendësi politik i Gardës Revolucionare të Iranit, Yadollaj Javani.
Kujtojmë se konflikti mes Iranit në njërën anë dhe SHBA-së dhe Izraelit në anën tjetër ka filluar që nga 28 shkurti, palët kanë sulmuar njëra tjetrën, ndërsa ajo që ka pasur ndikim ekonomik në të gjithë botën, ishte bllokimi i Ngushticës së Hormuzit, që është një nga rrugët detare më të rëndësishme, për transportimin e naftës së lëngshme./Alsat.mk.
The post SHBA-Iran / Shkëmbime zjarri të ndërsjellta në Ngushticën e Hormuzit appeared first on Alsat.