Presidenti i Shteteve të Bashkuara, Donald Trump, ka kërcënuar të bllokojë hapjen e një ure të re që lidh SHBA-në me Kanadanë, duke e lidhur vendimin me atë që ai e cilëson si mungesë “drejtësie dhe respekti” nga qeveria kanadeze, në mes të tensioneve të vazhdueshme tregtare mes dy vendeve.
Në një postim në platformën “Truth Social”, Trump deklaroi se nuk do të lejojë hapjen e urës derisa Shtetet e Bashkuara të kompensohen plotësisht dhe Kanadaja, sipas tij, të trajtojë SHBA-në me respektin që meriton.
Presidenti amerikan kërkoi gjithashtu që Ura Ndërkombëtare Gordie Howe, e ndërtuar mbi lumin Detroit, të jetë të paktën 50 për qind në pronësi të SHBA-së, duke shtuar se negociatat për këtë çështje do të nisin menjëherë.
Ura do të lidhë qytetin Windsor në provincën kanadeze të Ontarios me Detroitin në shtetin amerikan të Miçiganit dhe është projektuar me gjashtë korsi trafiku, si dhe hapësira për këmbësorë dhe çiklistë.
Ndërtimi i urës po financohet nga Kanadaja dhe pritet të kompensohet përmes taksave, ndërsa hapja e saj është planifikuar gjatë këtij viti. Zyrtarët kanadezë kanë theksuar se projekti do të rrisë ndjeshëm tregtinë mes dy vendeve fqinje.
Trump ka kritikuar Kanadanë për përdorimin e kufizuar të produkteve amerikane, si çeliku, në ndërtim, si dhe për afrimin e saj tregtar me Kinën. Ai ka paralajmëruar më herët edhe tarifa të ashpra ndaj importeve kanadeze.
Deklaratat e fundit vijnë pasi kryeministri kanadez, Mark Carney, mbajti një fjalim në Forumin Ekonomik Botëror në Davos, i interpretuar gjerësisht si kritikë ndaj politikës së Trump “Amerika e Para”.