Presidenti i SHBA-së, Donald Trump, ka thënë se armëpushimi është ende në fuqi midis SHBA-së dhe Iranit, pasi të dyja palët shkëmbyen zjarr vonë të enjten në mbrëmje. Nuk ishte e qartë se kush qëlloi i pari.
Komanda e lartë ushtarake e Iranit pretendoi se SHBA-ja kishte synuar një tanker nafte iranian dhe një anije tjetër që po i afrohej Ngushticës së Hormuzit dhe kreu “sulme ajrore” në disa zona bregdetare.
Ndërkohë, SHBA tha se iu përgjigj sulmeve iraniane ndaj Marinës amerikane në Ngushticë me “sulme vetëmbrojtjeje”.
Shpërthimi i tensioneve vjen një ditë pasi Ministria e Jashtme e Iranit kishte thënë se po shqyrtonte një propozim të SHBA-së për t’i dhënë fund luftës.
Herët të premten, Ministria e Mbrojtjes e Emirateve të Bashkuara Arabe tha se mbrojtja e saj ajrore po “angazhohej në mënyrë aktive” ndaj një sulmi me raketa dhe dronë nga Irani.
Media shtetërore iraniane fillimisht raportoi “shpërthime” në Ngushticën e Hormuzit, duke i përshkruar ato si një “shkëmbim zjarri” me “armikun”. Ndërkohë, media lokale raportoi se shpërthime u dëgjuan në Teheran.
SHBA-ja i përshkroi sulmet si “të paprovokuara” duke thënë se Irani nisi disa sulme me dronë e raketa.