Përmbysja e Real Madrid ndaj Roma e ka vënë në qendër të vëmendjes situatën rreth Vinicius Junior. Braziliani, i cili e nisi titullar ndeshjen në “Olimpico”, përjetoi një mbrëmje të vështirë, e cila përfundoi me zëvendësimin e tij ndërsa verdhekuqtë ishin në avantazh 3-1.
Megjithatë, vetëm pak minuta pasi ai u largua nga fusha, gjithçka ndryshoi: ‘los blancos’ shënuan tre gola brenda dhjetë minutash, duke realizuar një përmbysje të jashtëzakonshme. Vendimi i José Mourinho për ta zëvendësuar atë ndezi debate, veçanërisht për shkak të reagimit të brazilianit, i cili dukej dukshëm i pakënaqur.
Megjithatë, Vinicius tregoi vetëkritikë: “Është normale që u zemërova kur më zëvendësuan, sepse gjithmonë dua të jap më të mirën dhe të ndihmoj ekipin. Jam i zemëruar me veten sepse nuk po luaj në nivelin tim më të lartë, por ‘Vini’ gjithmonë gjen rrugën për t’u rikthyer; nuk kam asnjë dyshim se do të kthehem në formë.”
Braziliani vlerësoi gjithashtu kontributin e Endrick dhe Carlos Espí, të cilët luajtën rol kyç në përmbysje: “Zëvendësimet e ndryshuan ndeshjen. Endrick ndryshoi dinamikën dhe ishte lojtari më i mirë në fushë; Carlos hyri dhe shënoi“, tha sulmuesi brazilian.
Kjo është një periudhë delikate për lojtarin me numrin 7 të Realit, i cili deri më tani këtë sezon ka shënuar vetëm një gol dhe ka dhënë tre asiste në dhjetë ndeshje. “Vërshëllimat ndaj meje nuk më ndihmojnë, por e kuptoj që tifozët paguajnë për biletat e tyre. Ne luajmë më mirë kur ata janë në anën tonë”, tha Vini.
The post Vinicius: Po kaloj një periudhë të vështirë, u zemërova kur më zëvendësuan por aty ndryshoi ndeshja jonë appeared first on Telesport.