Gati një milion persona janë evakuuar në Filipine ndërsa vendi përgatitet për mbërritjen e tajfunit Fung-wong, i cili pritet të godasë bregun lindor të arkipelagut në orët e vona të natës.

Sipas autoriteteve, ujërat e përmbytjeve janë rritur ndjeshëm, ndërsa tajfuni pritet të sjellë erëra të fuqishme dhe reshje të dendura shiu në pjesë të mëdha të vendit.

Shkollat dhe zyrat qeveritare janë urdhëruar të mbyllen në të gjithë ishullin kryesor të Luzonit, përfshirë kryeqytetin Manilë, ku deri më tani janë anuluar rreth 300 fluturime.

Ishulli Catanduanes, i përshkruar nga shërbimi shtetëror i motit si një “shënjestër e drejtpërdrejtë”, është goditur që në orët e para të mëngjesit nga erëra të forta dhe reshje intensive.

Sipas zyrtarit të lartë të mbrojtjes civile, Rafaelito Alejandro, deri më tani janë evakuuar 916,863 persona. “Ndërsa flasim, ata po e ndiejnë ndikimin e tajfunit, veçanërisht në Catanduanes, sepse syri i stuhisë është më afër ”, tha ai në një konferencë për shtyp.

Erëra me shpejtësi deri në 230 kilometra në orë priten nga mbrëmja e sotme deri të hënën. Në Catanduanes, valët e larta kanë përmbytur rrugët bregdetare, ndërsa autoritetet kanë bërë thirrje për kujdes maksimal dhe shmangie të udhëtimeve në zonat e rrezikuara.