Të paktën 12 persona u vranë dhe 29 të tjerë u plagosën në një sulm terrorist që ndodhi gjatë festimit të natës së parë të Hanukkah në plazhin e famshëm Bondi të Sidneit.
Sulmi ndodhi rreth orës 6:47 të mbrëmjes sipas kohës lokale, kur të paktën dy persona të armatosur hapën zjarr ndaj rreth 1,000 personave të mbledhur në Parkun Archer, ku komuniteti hebre po organizonte një festë publike. Një vajzë 12-vjeçare dhe një rabin ishin midis të vdekurve, raportuan mediat.
Policia tha se njëri nga të dyshuarit u vra në vendngjarje, ndërsa i dyti u plagos dhe u vu në paraburgim. Mundësia që një i dyshuar i tretë të jetë i përfshirë nuk është përjashtuar, por hetimi është duke vazhduar.
Policia e Uellsit të Ri Jugor ka vendosur një kordon sigurie rreth disa pjesëve të Bondi Beach. Një automjet që përmbante pajisje shpërthyese të improvizuara u gjet pranë vendit të sulmit, të cilat më vonë u hoqën në mënyrë të sigurt nga shërbimet speciale.
Kryeministri australian Anthony Albanese e dënoi sulmin, duke e quajtur atë “një akt të lig, antisemitizmi dhe terrorizmi”.
“Ky ishte një sulm i synuar ndaj komunitetit hebre në një ditë që duhet të kishte qenë një ditë gëzimi dhe festimi. Ky është një goditje në zemrën e kombit tonë”, tha Albanese, i cili thirri një takim urgjent të Komitetit të Sigurisë Kombëtare.
Kryeministri i Uellsit të Ri Jugor, Chris Means, vlerësoi trimërinë e një qytetari që u përball me një nga sulmuesit dhe i mori armën.
“Ai njeri është një hero i vërtetë dhe pa dyshim ka shpëtuar shumë jetë”, tha Means.
Sulmi ka marrë dënim dhe shprehje ngushëllimi nga shumë udhëheqës botërorë. Presidenti izraelit Isaac Herzog e quajti sulmin një “akt të ndyrë terrorizmi”, ndërsa kryeministri britanik Keir Starmer dhe udhëheqësit e disa vendeve evropiane shprehën solidaritet me Australinë dhe familjet e viktimave.
The post Gjithçka që dimë deri më tani për sulmin në Bondi Beach të Sidneit appeared first on Alsat.
