Një ngjarje pazakontë ka ndodhur në Gaziantep të Turqisë, ku një taksist u mor peng nga një grabitës, i cili po përpiqej t’i ikte policisë, përcjell TV21. Shoferi i taksisë, i cili ia rrëmbeu armën grabitësit që po përleshej me policinë, Ramazan Yıldırım deklaroi: “Falë Zotit që asnjë polic nuk u lëndua, kjo më mjafton.”
Person i armatosur mori peng një shofer taksie dhe së bashku me të dashurën e tij i hapi zjarr policisë, duke rezistuar për një kohë të gjatë. Ngjarja, e cila filloi në një rreth dhe përfundoi në qendër të qytetit, u filmua nga kamera e brendshme e taksisë, ku shihet ndërhyrja e qetë e shoferit, i cili arriti t’i marrë armën sulmuesit dhe të parandalojë dëmtime të tjera.
“Gjuante ndaj policisë në çdo pikë kontrolli”
Shoferi Ramazan Yıldırım, duke folur për Ihlas News Agency, tha:
“Kam 20 vite që punoj si taksist në Araban. Dje një person thirri taksi përmes internetit. Kur shkova, ai kishte armë dhe po e përdorte gruan që ishte me të si mburojë. Mua më drejtoi armën. U ul në sediljen e pasme dhe më urdhëroi të nisem. Pas rreth 5 km, kur pa një patrullë policie, hapi zjarr ndaj tyre. Pas 10-15 km përsëri qëlloi ndaj një patrulle tjetër. Në Yavuzeli, policia na priste, por edhe aty më drejtoi armën dhe kaluam. Në një pikë tjetër kontrolli që kishte barrikadë, sërish hapi zjarr.”
“Qëllonte edhe automjete civile për të hapur rrugën.”
Ai shtoi se në një moment, në zonën e Galericiler Sitesi, i dyshuari filloi përsëri të qëllonte ndaj policisë:
“Policia ishte afër dhe po qëllonte në ajër për të na ndalur. Kur ai u përpoq të qëllonte një polic nga afër, unë ia kapa armën nga xhami i përparmë dhe e pengova të qëllonte. Pastaj ai e tërhoqi armën mbrapa dhe unë me gjithë forcën u përpoqa t’ia marr. Thirra policinë dhe ekipet ndërhynë.”
“Plaga ime nuk ka rëndësi, e rëndësishme është që policët janë mirë”
Yıldırım tha se gjatë përpjekjes është plagosur në dorë dhe ka marrë 7 qepje:
“Jam mirënjohës që asnjë polic turk nuk u lëndua. Plaga ime nuk ka rëndësi, e rëndësishme është që nuk u dëmtua askush tjetër.”