Brazili e nisi Kupën e Botës 2026 me një barazim ndaj Marokut, rezultat i pamjaftueshëm për 5 herë kampionët e botës, të cilët prej kohësh nuk po shfaqin më futbollin që mahniste botën. Menjëherë pas ndeshjes, kritikat u përqendruan te sulmuesi Igor Thiago, i cili humbi disa raste shumë të pastra për gol.
Megjithatë, legjenda argjentinase Jorge Valdano mendon se problemi i vërtetë i Brazilit është shumë më i thellë. “Futbolli mund të jetë shumë mizor. Një javë të lavdërojnë, sepse shënon gola në një nga ligat më të forta në botë, dhe javën tjetër njerëzit pyesin nëse e di ku është porta”, – tha fillimisht Valdano.
Ai vazhdoi: “I kam parë shakatë, kam parë njerëz që pyesnin si mundet një sulmues që ka shënuar më shumë se 20 gola në Angli të humbasë raste të tilla. Pikërisht kjo e bën futbollin një sport kaq brutal. Askush nuk i kujton 20 golat kur humbet rastin që sapo kanë parë. Ajo që më habiti nuk ishte kritika. Kritika është normale në Brazil. Ajo që më habiti ishte sa shpejt njerëzit u kthyen kundër tij”.
Valdano mbrojti sulmuesin brazilian duke theksuar: “Po, humbi raste të mëdha. Raste që mund ta kishin ndryshuar krejtësisht bisedën rreth ndeshjes, por të mos bëjmë sikur po fshihej. Ai po pozicionohej në vendet e duhura, ndërsa të tjerët mezi krijonin diçka. Nuk ka shënuar më shumë se 20 gola rastësisht. Nuk mbijeton në Premier League vetëm me fat, qartësisht është një lojtar i madh”.
Në fund, Valdano dha verdiktin e tij të prerë: “Ajo për të cilën Brazili duhet të shqetësohet nuk është një sulmues që humbet raste. Duhet të shqetësohet pse e gjithë skuadra dukej kaq e shkëputur gjatë periudhave të gjata të ndeshjes. Nëse Brazili vazhdon të luajë kështu, Igor Thiago nuk do të jetë i vetmi lojtar që do të përballet me kritika”.
The post “Jo vetëm sulmuesi që humbet raste…”; kritika të ashpra nga Valdano ndaj Brazilit të Ancelottit appeared first on Telesport.