Në periudhën nga 2 shkurti deri më 31 maj 2026, në sistemin “Qyteti i Sigurt” janë evidentuar gjithsej 33.722 shkelje të kryera nga automjete me targa të huaja, bëjnë të ditur për “Sloboden Peçat” nga Ministria e Punëve të Brendshme (MPB), informon PressOnline.al
Prej tyre, numri më i madh i shkeljeve është regjistruar në muajin maj – 11.258, ndërsa numri më i vogël gjatë muajit shkurt – 4.301.
Ministri i Punëve të Brendshme, Pançe Toshkovski, së fundmi paralajmëroi se të gjithë drejtuesit e mjeteve që kalojnë tranzit nëpër Maqedoni do të përfshihen në sistemin “Qyteti i Sigurt”. Siç theksoi ai, çdo shkelje e rregullave të trafikut e kryer që nga 1 shkurti 2026, nga dita e vënies në funksion të sistemit, do t’i dërgohet çdo personi që ka kryer shkelje, pavarësisht nëse bëhet fjalë për shtetas vendor apo të huaj.
“Së shpejti do të jeni dëshmitarë të zbatimit të plotë dhe tërësor të hapit të dytë, i cili ka të bëjë me dorëzimin e gjobave për ata që drejtojnë automjete me targa të huaja. Shkeljet evidentohen dhe për një kohë të shkurtër do t’u dorëzohen atyre që nuk i respektojnë rregullat”, tha Toshkovski.
Ai theksoi se gjobat për shtetasit e huaj do t’u dorëzohen në pikat kufitare gjatë daljes nga vendi.
Ministri nënvizoi se në shekullin XXI, falë teknologjisë dhe inteligjencës artificiale, do të gjendet një zgjidhje për t’ua dorëzuar gjobat për shkeljet shtetasve të huaj.
“Nëse në këtë kohë nuk gjejmë një mënyrë për t’ua dorëzuar, mendoj se kemi problem me vetveten. Do të duhet kohë, procesi nuk është i thjeshtë për t’u zbatuar, por do ta realizojmë dhe, ashtu siç është zbatuar për qytetarët e Maqedonisë, do të vlejë edhe për të tjerët që kalojnë tranzit dhe shkelin rregullat, duke rrezikuar jetën e tyre dhe të pjesëmarrësve të tjerë në komunikacion. Gjobat do t’i dërgojmë përmes mesazheve SMS ose përmes një aplikacioni; duhet vetëm të ketë vullnet. Do të na duhet kohë, kemi menduar një zgjidhje dhe do ta zbatojmë, ndërsa shumë shpejt do t’ju bindim se funksionon”, tha Toshkovski, përcjell PressOnline.al
Ai nuk sqaroi nëse shtetasit e huaj do të duhet të paguajnë menjëherë në kufi, nëse do të kenë mundësi të paguajnë në mënyrë elektronike, çfarë do të ndodhë nëse refuzojnë të paguajnë dhe nëse do të ketë shkëmbim të të dhënave me shtete të tjera për arkëtim të detyrueshëm.
Sistemi “Qyteti i Sigurt” filloi të zbatohet në fillim të 1 shkurtit 2026, pas miratimit të ndryshimeve ligjore që mundësuan evidentimin automatik të shkeljeve në komunikacion përmes një rrjeti kamerash të vendosura në më shumë lokacione në të gjithë vendin. Qëllimi është ulja e numrit të aksidenteve në komunikacion dhe përmirësimi i respektimit të rregullave të trafikut.
Kamerat regjistrojnë disa lloje shkeljesh, ndër to tejkalimin e shpejtësisë së lejuar, kalimin në semafor me dritë të kuqe, përdorimin e telefonit celular gjatë drejtimit të automjetit, mosvendosjen e rripit të sigurisë dhe shkelje të tjera të parashikuara me Ligjin për Sigurinë e Komunikacionit në Rrugë.
Ndryshe nga automjetet me targa vendore, te automjetet me targa të huaja procedura për dorëzimin dhe arkëtimin e gjobave është më e ndërlikuar, pasi kërkon identifikimin e pronarit dhe një mekanizëm për arkëtim ndërkufitar. Për këtë arsye, MPB paralajmëron zgjidhje shtesë teknike.
Në shumë vende evropiane, sisteme të tilla funksionojnë edhe për automjetet me targa të huaja përmes marrëveshjeve dypalëshe dhe shkëmbimit të të dhënave ndërmjet institucioneve, gjë që mundëson që gjobat t’u dorëzohen drejtuesve edhe pas largimit nga shteti.(PressOnline.al)