Legjenda braziliane Ronaldinho, ish-ylli i Barcelona-s, Paris Saint-Germain dhe Milan-it, po përgatitet të shtojë një kapitull të ri në karrierën e tij të shkëlqyer futbollistike, këtë herë larg fushave të futbollit.
Fituesi i Topit të Artë në vitin 2005 ka paraqitur një ofertë zyrtare për të marrë drejtimin e klubit të basketbollit AS Monaco, sipas gazetës franceze “L’Équipe”.
Ai është lidhur në partneritet me fondin e investimeve Andorrane Clayton Sport, që i ka paraqitur një ofertë drejtorit ekzekutiv të AS Monaco, Oleksiy Yefimov.
Klubi francez po kalon një periudhë jashtëzakonisht të vështirë financiare dhe duhet të gjejë shpejt një zgjidhje për të ruajtur vendin në divizionin e parë.
Oferta nga Ronaldinho dhe Clayton Sport është shumë ambicioze. Sipas raportimeve, kjo përfshin zgjidhjen e borxheve me vlerë 2.5 milionë euro ndaj EuroLeague dhe ofrimin e një garancie bankare me vlerë 5 milionë euro, shuma e kërkuar nga organi rregullator financiar francez (DNCCG).
Përtej kësaj, investitorët po shqyrtojnë një angazhim për një periudhë midis tre dhe pesë vjetësh, me një investim deri në 10 milionë euro në sezon.
Vetë Ronaldinho mund të kontribuojë financiarisht në projekt dhe të luajë një rol kyç në të. Kjo do të shënonte një pikë kthese në karrierën e ish-yllit të Barcelonës, i cili është shumë më i mësuar me fushat e futbollit sesa me fushat e basketbollit.
The post Larg futbollit: Ronaldinho bën një ofertë zyrtare për të shpëtuar klubin francez appeared first on Telesport.