Edicioni i 23-të i Ekspozitës Kinë-ASEAN (CAEXPO) u hap të enjten në Nanning, kryeqendra e Rajonit Autonom Guangxi Zhuang në Kinën jugore, duke nxjerrë në pah mundësi të reja biznesi në kuadër të kornizës 3.0 të Zonës së Tregtisë së Lirë Kinë-ASEAN (CAFTA).
Panairi, që mbahet në datat 17 – 21 shtator, ka tërhequr më shumë se 3400 kompani nga mbi 70 vende dhe rajone. Sipas organizatorëve, hapësira e ekspozitës mbulon rreth 170 mijë metra katrorë, ndërsa numri i kompanive pjesëmarrëse është rritur me 5.3% krahasuar me edicionin e kaluar.
Ekspozita përfshin produkte dhe projekte që mbulojnë industritë tradicionale, komunikimet dixhitale, zhvillimin e gjelbër dhe inteligjencën artificiale (IA). Një hapësirë tregu e dedikuar për IA prezanton më shumë se 500 produkte, ndërsa një zonë e re ekspozimi përqendrohet gjithashtu tek nevojat e vendeve të ASEAN-it, duke vënë në pah kërkesat e tyre për bashkëpunim në fusha si transporti, logjistika inteligjente, IA, menaxhimi urban dhe zhvillimi i zonave industriale.
Zona e re e ekspozitës është krijuar për të lehtësuar një bashkëpunim më të synuar, përmes një sistemi inteligjent për lidhjen e partnerëve. Janë identifikuar paraprakisht më shumë se 8000 çifte partnerësh të mundshëm bashkëpunimi, ndërsa janë planifikuar edhe rreth 2000 sesione shtesë për lidhjen e partnerëve gjatë ekspozitës.
Sistemi ka mbledhur rreth 60 projekte me kërkesa bashkëpunimi nga vendet ASEAN dhe i ka lidhur ato me gati 40 projekte kineze cilësore, për të ndihmuar kompanitë në ndjekjen e partneritetit.
Gjatë panairit janë planifikuar të zhvillohen më shumë se 50 aktivitete për promovimin e tregtisë dhe investimeve, me fokus tek lehtësimi i tregtisë dhe investimeve, integrimi ekonomik rajonal dhe bashkëpunimi ndërkufitar industrial në zinxhirin e furnizimit. Paralelisht me panairin po mbahet Samiti i 23-të i Biznesit dhe Investimeve Kinë-ASEAN.
Kina dhe ASEAN po përshpejtojnë zbatimin e Protokollit të Përmirësimit të CAFTA 3.0, të nënshkruar në tetor 2025, i cili përfshin fusha të tilla si ekonomia dixhitale dhe zhvillimi i gjelbër.
Lidhjet ekonomike midis Kinës dhe ASEAN-it kanë vazhduar të thellohen. Tregtia dypalëshe e kaloi shifrën prej 1 trilion dollarësh për herë të parë në vitin 2025, duke arritur në 1.05 trilionë dollarë, me një rritje prej 7.4% krahasuar me vitin paraardhës. Në shtatë muajt e parë të vitit 2026, tregtia midis dy palëve arriti në 744.41 miliardë dollarë, një rritje prej 24.7% në baza vjetore, duke përbërë 21.8% të totalit të tregtisë së jashtme të Kinës.
Kina ka mbetur partneri më i madh tregtar i ASEAN për 17 vite rradhazi, ndërsa ASEAN ka qenë partneri më i madh tregtar i Kinës për gjashtë vjet rradhazi.