Përfaqësuesja e Maqedonisë po i përfundon përgatitjet për ndeshjen e parë ndaj Zvicrës. Me këtë ndeshje futbollistët maqedonas hapin ciklin e ri në Ligën e Kombeve dhe sezonin e tyre të parë në Ligën B. Në grupin B1, përveç Zvicrës, kundërshtarë janë edhe Sllovenia dhe Skocia. Zvicra në Kampionatin Botëror këtë verë arriti deri në çerekfinale, ku u eliminua nga Argjentina.
Pas katër stërvitjeve në prag të ndeshjes, trajneri Goce Sedlloski është i kënaqur me angazhimin dhe punën e futbollistëve.
“Jam shumë i kënaqur me të gjithë lojtarët. Të katër stërvitjet i kanë zhvilluar maksimalisht dhe e dinë se çfarë duhet të bëjnë në fushë. Duhet të luajmë ndaj çdo kundërshtari, kështu edhe ndaj Zvicrës së fortë. E dimë se çfarë grupi lojtarësh kanë, por dua që para së gjithash të mendojmë për veten. Të gjithë futbollistët tanë janë të shëndetshëm dhe stërviten mirë, përveç Nikollovit, i cili nuk do të luajë. Me ndihmën e publikut besoj se mund të arrijmë rezultat pozitiv. Presim mbështetje të madhe nga tribunat, ndërsa detyra jonë është të tregojmë lojë të mirë”, deklaroi Sedlloski.
Sedlloski do të vendosë për 11-shen startuese pas stërvitjes së mbrëmjes. Ndeshja ndaj një prej përfaqësueseve më cilësore evropiane është caktuar të shtunën në orën 20:45, në Arenën Kombëtare “Todor Proeski” në Shkup.