Në asamblenë e përgjithshme të “European Football Clubs” (EFC) në Kopenhagë, presidenti Nasser Al-Khelaifi njoftoi rikthimin e Real Madridit në organizatë: “Real Madridi do të rikthehet në EFC”. Pas Juventusit dhe Barcelonës, ky është një tjetër hap drejt pajtimit mes klubeve të mëdha europiane, pas përplasjes së nisur në vitin 2021 me projektin e Superligës.
EFC tashmë ka mbi 900 klube anëtare. Në këtë afrim ka ndikuar edhe krijimi i UC3, sipërmarrjes së përbashkët përmes së cilës klubet marrin pjesë në menaxhimin e të drejtave televizive të kompeticioneve të UEFA-s.
Al-Khelaifi iu drejtua Aleksander Ceferinit, duke i kërkuar të rikandidojë për drejtimin e UEFA-s në vitin 2027: “Të kërkoj, në emër të EFC-së, të rikandidohesh për drejtimin e UEFA-s më 2027”.
Ceferin sulmoi presidentin e FIFA-s, Gianni Infantino: “Mbreti është lakuriq, tani e dimë. Flet për zhvillim, demokratizim, konsultim, por bën të kundërtën. Tani themi mjaft”. Ai shtoi: “Nuk mund ta trajtosh futbollin si një produkt të thjeshtë. Asnjë autoritet nuk mund ta shesë futbollin”.
Në fund, Ceferin deklaroi: “Futbolli nuk ka nevojë për oborre apo perandorë. Futbolli nuk është në shitje, as dje, as sot, as nesër”.
The post Ceferin kundër Infantinos: Do ta shesë futbollin. “Mbreti” është lakuriq, tani e dimë… appeared first on Telesport.