“Është një ndjenjë unike dhe nder. Kam shumë emocione që është e vështirë t’i shpreh. Të gjithë fëmijët kanë ëndrra, e imja ishte të luaja në një ekip të madh dhe të fitoja trofe. ‘Topi i Artë’ është më shumë se një ëndërr. Prandaj është nder dhe privilegj ta marr këtë trofe. Nëse e kam fituar, është sepse kam bërë diçka të veçantë këtë vit”.
Këto ishin fjalët e emocionuara të Luka Modrić, atëherë 33 vjeç, në dhjetor 2018, kur mori trofeun që e shpallte lojtarin më të mirë në botë. Tani, gati 8 vite më vonë, Pascal Ferré, ish-drejtori i “France Football”, ka treguar për “RMC Sports” prapaskenën e atij edicioni dhe mënyrën se si Modrić e mori lajmin.
Rreth dy javë para ceremonisë, Ferré telefonoi kroatin për t’i komunikuar rezultatin e votimit. Në telefonatën e parë, Luka nuk u përgjigj: “Më telefonoi përsëri pas pesë ose gjashtë minutash. Dhe e njoftova se kishte fituar. I thashë: Mirë se erdhe në familjen e Topit të Artë”.
Fjalët e tronditën Modrić: “Pastaj, nuk kisha askënd në anën tjetër të telefonit. Madje pata përshtypjen se telefonata ishte ndërprerë. Pati një heshtje emocionuese, mund t’i dëgjoja lotët e tij. Më pas e mblodhi veten dhe më pyeti nëse ishte e vërtetë. I thashë: Mos fol për këtë. A mund t’ia tregoj gruas sime, më pyeti”.
Më vonë, Modrić i tregoi Ferrés çfarë kishte ndodhur: “Kur më telefonove për të ma thënë dhe nuk u përgjigja, nuk ishte sepse isha i zënë, por sepse pashë numrin tënd në ekran dhe e dija çfarë do të më thoje. Më pushtoi emocioni dhe nuk munda të të përgjigjesha”.
The post Prapaskena e pabesueshme e “Topit të Artë” të Modrić: “I iku zëri, mund t’i dëgjoja lotët e tij…” appeared first on Telesport.