Trajneri i Manchester United, Michael Carrick, foli ashpër pas humbjes 1-4 ndaj Como në Champions League. “Jam vërtet i zemëruar. Të luajmë në atë mënyrë është e papranueshme“, u shpreh trajneri anglez.
Pavarësisht gjithçkaje që United bëri gabim gjatë ndeshjes, ishte qasja e lojtarëve ajo që spikati në vlerësimin e tij pas ndeshjes.
“Patjetër që do të analizoj atë që kemi bërë ne si staf teknik ose nëse bëhet fjalë për motivimin, qëllimin, objektivin dhe intensitetin që duhet të shfaqësh në një ndeshje futbolli. Këtë herë nuk e shfaqëm këtë”, tha Carrick.
Më tej, ai sqaroi: “Nuk mund ta aktivizosh dhe çaktivizosh angazhimin sipas dëshirës. Nuk mund të zgjedhësh se kur dëshiron të luash mirë e kur jo, ose kur të japësh gjithçka e kur ndoshta jo”.
Carrick u kërkoi ndjesë tifozëve të United që kishin udhëtuar për ta ndjekur skuadrën: “Nuk ishte çështje golash. Ishte mënyra se si luajtëm, ishte e vështirë ta shihje”.
Për të ardhmen e tij, gjithnjë e më shumë në dilemë, ai tha: “Tani për tani, nuk bëhet fjalë për mua. Rezultatet mund të vijnë e të ikin, por duhet të luash në një mënyrë të caktuar. Ajo që pamë sot nuk ishte e tillë.”
The post Carrick: Nuk bëhet fjalë për të ardhmen time, e papranueshme që United të luajë në këtë mënyrë appeared first on Telesport.