Rrëfimi i Scott McTominay nga grumbullimi i kombëtares së Skocisë është vërtet mbresëlënës. Në një konferencë për shtyp, mesfushori i Napoli tregoi se çfarë ndodhi pak ditë para fillimit të Kupës së Botës 2026.
“M’u desh t’i nënshtrohesha një ndërhyrjeje për t’i dhënë një goditje elektrike zemrës sime,” zbuloi ai. “Kjo ndodhi dy ditë para ndeshjes sonë të parë kundër Haitit. Ke bërë një përgatitje të shkëlqyer, je në formë të mrekullueshme dhe papritur ndodh diçka e tillë. Kur përballesh me një situatë të tillë, e pyet veten: ‘Si mund të më ndodhte mua kjo?’”
Në thelb, 29-vjeçari u vendos nën anestezi të përgjithshme për të korrigjuar ritmin e zemrës. Më pas, ai mori miratimin mjekësor për të luajtur kundër Haitit, ndeshje të cilën e fituan 3–0 dhe më vonë mori pjesë në ndeshjet kundër Marokut dhe Brazilit, të cilat përfunduan me humbje.
“Ndonjëherë gjërat nuk shkojnë ashtu siç do të dëshiroje,” vazhdoi McTominay. “Isha 100% në formë, por sigurisht, të gjendesh në një shtrat spitali dy ditë para ndeshjes së parë të Kupës së Botës, duke pritur të të vënë në gjumë (anestezi)… nuk është aspak situatë ideale, apo jo?”
Më herët gjatë sezonit, skocezi iu nënshtrua një ndërhyrjeje në zemër për të korrigjuar një aritmi të lehtë dhe beninje. Pasi mori lejen mjekësore për të garuar, mesfushori u rikthye të luante rregullisht për Napolin. “Tani jam mirë,” përfundoi McTominay. “Ndihem shumë, shumë më mirë se më parë“.
“Besoj se ishte diçka që duhej bërë. Në karrierën e dikujt mund të ndodhin momente të tilla, gjëra që mund të të zënë paksa në befasi. Natyrisht, situata mund të duket shumë më serioze për mediat, ose për familjarët dhe miqtë që të kontaktojnë pasi kanë dëgjuar lajme për një problem me zemrën”, tha skocezi.
“Por, në realitet, ishte një procedurë relativisht e thjeshtë. Kështu që, jam vërtet i lumtur që jam rikthyer dhe po luaj sërish futboll. Është gjëja më e rëndësishme në jetën time dhe gjithmonë do të mbetet e tillë. Për mua, ajo që ka më shumë rëndësi është të rikthehem gjithmonë më i fortë“, deklaroi ai.
The post McTominay: Dy ditë para botërorit iu nënshtrova një ndërhyrjeje ku m’u dha një goditje elektrike në zemër appeared first on Telesport.