Një situatë shqetësuese ka përfshirë Universitetin “Shën Kirili dhe Metodi” në Shkup, ku katër fakultete dhe ndërtesa e Rektoratit mbetën për disa orë pa energji elektrike për shkak të faturave të papaguara, të cilat raportohet se arrijnë në rreth 500 mijë euro.

Fakultetet e Makinerisë, Elektroteknikës, Shkencave Natyrore dhe Matematikës, si dhe Bujqësisë, u përballën me ndërprerjen e energjisë elektrike. Pas disa orësh, furnizimi u rikthye, por EVN vendosi afat deri më 20 nëntor për shlyerjen e detyrimeve.

Skandali ngre pikëpyetje serioze për menaxhimin financiar të institucioneve arsimore dhe përgjegjësinë e Ministrisë së Arsimit.

Si është e mundur që universiteti më i madh shtetëror në vend të përfundojë në një situatë ku fakultetet rrezikojnë të mbeten pa energji elektrike për shkak të faturave të papaguara?

Ndërkohë, ministrja e Arsimit, Vesna Janevska, ka deklaruar se borxhet po shlyhen rregullisht dhe se nuk pret ndërprerje të tjera. Megjithatë, kjo deklaratë nuk i largon pikëpyetjet për mënyrën se si u krijua një borxh i tillë dhe pse u lejua që situata të arrinte deri te ndërprerja e energjisë.

Studentët, profesorët dhe stafi universitar nuk duhet të paguajnë çmimin e problemeve financiare dhe të mungesës së koordinimit institucional.

Në vend të deklaratave qetësuese, publiku meriton përgjigje konkrete: Kush është përgjegjës për borxhin prej gjysmë milioni eurosh? Pse faturat nuk u paguan me kohë? Dhe a do të ketë përgjegjësi për këtë situatë?

Arsimi nuk mund të flasë për modernizim, cilësi dhe reforma, ndërsa fakultetet shtetërore rrezikojnë të mbeten pa rrymën bazë për funksionimin e tyre.

The post 🔴 Borxhi prej 500 mijë eurosh lë fakultetet pa rrymë në Shkup – EVN jep ultimatum deri të premten, ndërsa Ministria e Arsimit hesht për keqmenaxhimin! first appeared on .