Gigi Buffon këmbëngul se Juventusi “nuk është i detyruar të fitojë” në sezonin e tij të parë nën drejtimin e trajnerit të ri Thiago Motta. Megjithatë, ai shpreson se ndeshja e fundjavës me Milanin do të jetë “po aq argëtuese sa Inter-Juve”.
Bardhezinjtë janë dy pikë larg liderit të Serie A, Napoli, një pikë prapa grupit tjetër të skuadrave duke përfshirë Interin, Atalantën, Fiorentinën dhe Lazion. Pra, gara e titullit është tërësisht e hapur në Itali.
“Ne po shohim një kampionat magjepsës, me surpriza, që e ka bërë këtë fillim sezoni edhe më të veçantë, – tha Buffon për “Sky Sport Italia” në prezantimin e “Kings League”. – Shpresojmë që ky lloj ekuilibri të zgjasë sa më gjatë që të jetë e mundur, sepse ky pasion po ushqen gjithashtu interesin për kampionatin”.
Ish-portieri i Juventusit dhe Parmës, tani shefi i delegacionit të kombëtares italiane, nuk mund të mos i hedhë sytë nga klubi i tij i vjetër. Është thënë se Napoli, nën drejtimin e Antonio Contes, dhe Juventusi me Thiago Motta në stol konsiderohen favoritë për ta ndaluar Interin të mbrojtë titullin, por ish-portieri i shquar e sheh ndryshe:
“Thiago Motta po ecën shumë mirë, duke pasur parasysh se janë fillimet e tij me bardhezinjtë. Të paktën për këtë sezon, Juventusi nuk është i detyruar të fitojë, kështu që po bën shumë mirë”.
Juventusi dhe Milani do të përballen në “San Siro” të shtunën, në kuadrin e javës së 13-të të Serie A, vetëm disa javë pas barazimit emocionues 4-4 midis “Zonjës së Vjetër” dhe Interit, po në atë stadium.
Ja prognoza e Buffon: “Pres të jetë një sfidë shumë e mirë mes dy skuadrave që luajnë futboll të hapur dhe sulmues. Shpresoj të jetë ndeshje po aq argëtuese dhe po aq e mirë, reklamë për Serie A, sa ishte Inter-Juventus”.
Buffon ishte në “San Siro” të dielën, kur Italia u mund 3-1 nga Franca në Ligën e Kombeve: “Ishte zhgënjyese, sepse duke marrë parasysh gjithçka që kemi bërë që nga shtatori, e merituam ta zinim vendin e parë në grup. Megjithatë, kjo është jeta, ju bini poshtë, ngriheni përsëri, tentoni përsëri dhe përsëri. Mendoj se dalim me më shumë besim nga kjo ndeshje, sepse të tre golat e Francës ishin nga goditjet standarte”.
The post “Juventusi nuk është i detyruar ta fitojë titullin këtë sezon, pres ndeshje argëtuese ndaj Milanit” appeared first on Telesport.