Operacionet e shpëtimit kanë hyrë në një fazë të re në Portin Gyirong në Rajonin Autonom Xizang të Kinës Jugperëndimore, pas riparimit të një rruge emergjente që të çon në zonën qendrore të fatkeqësisë dhe rivendosjes së energjisë elektrike.
Rrëshqitja e dheut më 26 gusht, e shkaktuar nga shembja e një akullnaje në lartësi të madhe në Nepal, ka lënë 21 persona të vdekur dhe 541 të tjerë të zhdukur në Xizang, deri më 2 shtator.
Deri më tani janë angazhuar më shumë se 2300 veta personel, mbi 400 automjete, 8000 komplete pajisjesh shpëtimi dhe mbi 800 fluturime me dron. Pavarësisht rreziqeve të vazhdueshme të rrëshqitjeve të dheut dhe rrëzimeve të shkëmbinjve, ekipet e vijës së parë punuan pa ndërprerje për të rivendosur linjat e përkohshme të energjisë elektrike. Energjia elektrike u rivendos më 3 shtator rreth orës 8 të mbrëmjes.
Kthimi i energjisë elektrike ka rritur mbështetjen bazë për operacionet në vijën e parë dhe ka krijuar kushte më të mira për punën e kërkim-shpëtimit. Shërbimet e komunikimit janë forcuar gjithashtu, me 12 stacione bazë të rivendosura.
Punëtorët e Rrjetit Shtetëror riparojnë linjat e energjisë elektrike në Qarkun Gyirong, Rajoni Autonom Xizang i Kinës Jugperëndimore, 2 shtator 2026. /Foto nga VCG
Me rikthimin e aksesit rrugor, ekipet e shpëtimit kanë zhvendosur më shumë personel dhe pajisje në zonën qendrore të prekur, për një raund të ri kërkimesh intensive.
Një total prej 336 shpëtimtarësh kanë kryer raunde të shumta kërkimesh sistematike në zonën qendrore, duke mbuluar më shumë se 1.6 milion metra katrorë. Fokusi tani është në tre detyra kryesore: kërkim-shpëtim, pastrim rrugësh dhe mbeturinash, dhe parandalim dhe dezinfektim epidemik.
Gërmimet me makineri të rënda vazhdojnë mes kërcënimeve natyrore. Por rihapja e aksesit në rrugë, nuk do të thotë që operacioni i shpëtimit është bërë më i lehtë.
Gazetarët e CGTN në vendngjarje kanë dokumentuar reshje të vazhdueshme të dendura shiu, ujë që rrjedh me shpejtësi dhe rrëzime shkëmbinjsh të rastit në zonën përreth Portit Gyirong. Rrjedha të mëdha uji vazhdojnë poshtë shpateve të malit, ndërsa automjetet e shpëtimit dhe makineritë e rënda punojnë përgjatë pjesëve të dëmtuara të rrugës.
Terreni i paqëndrueshëm do të thotë që ekipet e shpëtimit duhet të balancojnë nevojën për të pastruar mbeturinat dhe për të kërkuar për njerëzit e zhdukur, me nevojën për të mbrojtur personelin në vijën e parë nga fatkeqësitë dytësore. Pajisje të rënda, duke përfshirë ekskavatorë dhe ngarkues, janë vendosur për të përforcuar dhe pastruar rrugët e dëmtuara.
Ndërsa operacionet e kërkimit dhe pastrimit vazhdojnë, masat parandaluese të epidemive po kryhen njëkohësisht në zonën qendrore.
Në Portin Gyirong ka punuar një ekip dezinfektimi dhe parandalimi. Ekipi është i ndarë në tre grupe me nga pesë persona, me personel që ndryshohet çdo tetë orë për të mbajtur operacione dezinfektimi 24-orëshe. Ata po zvogëlojnë rreziqet e shëndetit publik pas fatkeqësisë, veçanërisht në zonat e prekura nga balta, uji i ndenjur dhe mbeturinat.
Fatkeqësia ka nxitur gjithashtu përpjekje të gjera për t’u kujdesur për banorët e prekur dhe familjet e të zhdukurve ose të vrarëve. Autoritetet kanë krijuar shërbime të dedikuara për të afërmit e viktimave, duke përfshirë linja telefonike brenda dhe jashtë Kinës. Kujdesi mjekësor, arsimi, ndihma bazë për jetesë dhe mbështetja psikologjike janë shtrirë për 499 banorë të zhvendosur.
Banorët dhe bizneset në Gyirong janë bashkuar. Ata kanë ngritur vullnetarisht pika shërbimi të përkohshme 24/7, duke ofruar furnizime dhe akomodim falas për personelin e shpëtimit dhe banorët e prekur.
Një operator përdor një pajisje monitorimi me video lazer me inteligjencë artificiale në një vend shpëtimi në Xigaze, Rajoni Autonom Xizang i Kinës Jugperëndimore, 3 shtator 2026. /Foto nga VCG
Autoritetet po monitorojnë gjithashtu nga afër mundësinë e rreziqeve të mëtejshme gjeologjike dhe hidrologjike.
Një ekip prej 93 ekspertësh dhe personel teknik, është organizuar për të monitoruar rrezikun e shembjeve dytësore, rrëshqitjeve të dheut dhe rrëshqitjeve të baltës në zona duke përfshirë digën penguese dhe zonën burimore të shembjes së shkëmbit akullnajor.
Ekspertët po kryejnë gjithashtu inspektime të rreziqeve gjeologjike, përgjatë rrugëve që çojnë në kufi. Ata po monitorojnë reshjet, temperaturën dhe nivelet e ujit në pellgjet e lumenjve Purepu Zangbo, Donglin Zangbo dhe Gyirong Zangbo. Monitorimi i zonës së shembjes së shkëmbit akullnajor, vazhdon përmes një kombinimi të patrullave njerëzore dhe mbikëqyrjes teknologjike.
Reshjet e vazhdueshme të shiut mbeten një shqetësim i madh.
Fatkeqësia ka nxitur gjithashtu koordinim të vazhdueshëm midis Kinës dhe Nepalit. Policia e Nepalit tha se numri i të vdekurve nga katastrofa është rritur në 1252, me më shumë se 4800 njerëz ende të zhdukur.
Grupi i tretë i furnizimeve të ndihmës emergjente të Kinës mbërriti në Katmandu më 3 shtator, në bordin e një avioni transporti Y-20 të Forcave Ajrore Kineze. Dërgesa përfshin njësi frigoriferike për ruajtjen e trupave, furnizime për parandalimin e epidemive dhe gjëra të nevojshme të përditshme të kërkuara urgjentisht nga Nepali.
Dhjetë ekspertë identifikimi mjeko-ligjor mbërritën gjithashtu në Katmandu, si pjesë e ekipit të katërt të ekspertëve të ndihmës të Kinës, duke mbështetur përpjekjet për të identifikuar viktimat.
Kontingjenti i dytë i ndihmës humanitare të Kinës mbërriti në Katmandu, Nepal, 9 shtator/Foto nga Xinhua
Vullnetarët mjekësorë kinezë po punojnë gjithashtu me komunitetet e prekura në Nepal.
Nepali ka shprehur falënderime për ndihmën e vazhdueshme të Kinës. Ministri i Jashtëm Shisir Khanal tha se Nepali e vlerëson sinqerisht mbështetjen e Kinës në këtë katastrofë. Khanal tha se Kina dhe Nepali ndajnë ekosistemin e Himalajeve dhe përballen me sfida të përbashkëta nga ndryshimet klimatike, duke theksuar rëndësinë e bashkëpunimit ndërkombëtar.
Zëdhënësi i Ministrisë së Jashtme kineze, Guo Jiakun, tha se Pekini do të vazhdojë të ofrojë ndihmë emergjente dhe të kryejë bashkëpunim ndërkombëtar shpëtimi, në përgjigje të nevojave të Nepalit. Ai gjithashtu shtoi se Kina dhe Nepali kanë punuar ngushtë që nga katastrofa, për të ndarë informacionin e monitorimit dhe paralajmërimit të hershëm dhe për të koordinuar reagimin ndaj katastrofave.