Qiproja nuk rrezikohet nga sulmet iraniane, për sa kohë bazat britanike në ishull nuk përdoren për veprime ushtarake kundër Iranit. Kështu kanë deklaruar burime diplomatike iraniane për mediat qipriote.
Sipas burimeve, kanali diplomatik mes Qipros dhe Teheranit mbetet i hapur dhe aktiv, ndërsa dy palët po zhvillojnë diskutime për një sërë çështjesh, përfshirë edhe përdorimin e bazave britanike në Qipro.
Deklaratat vijnë një ditë pas një raportimi të Financial Times, i cili, duke cituar zyrtarë iranianë, shkruante se Irani po shqyrton mundësinë e zgjerimit të konfliktit edhe në territore evropiane që mund të përdoren për operacione kundër Republikës Islamike. Në këtë kuadër ishte përmendur edhe Qiproja.
Burimet diplomatike iraniane shprehën rezerva për deklaratat e publikuara në media, duke theksuar se deklarata të tilla nga burime iraniane nuk janë gjithmonë të besueshme dhe mund të jenë reagime ndaj kërcënimeve të palës tjetër.
Sa i përket Qipros, burimet theksuan se dialogu diplomatik mes dy vendeve është aktiv dhe se po zhvillohen bisedime edhe për bazat britanike.
Sipas tyre, nëse bazat britanike nuk ndërmarrin veprime armiqësore kundër Iranit, nuk pritet që ato të bëhen objektiv i sulmeve iraniane.
Teherani, sipas burimeve, është gjithashtu në dijeni të shqetësimeve të autoriteteve qipriote për sigurinë e qytetarëve që jetojnë dhe punojnë brenda zonave të bazave britanike.
Në të njëjtën kohë, pala iraniane argumenton se përdorimi i këtyre bazave në operacione kundër Iranit mund të vërë në rrezik edhe jetën e qytetarëve iranianë.