Kanadaja ka kërkuar zyrtarisht rinovimin e marrëveshjes së tregtisë së lirë të Amerikës së Veriut (USMCA) me Shtetet e Bashkuara dhe Meksikën, ndërsa afrohet afati i korrikut për rinegocimin e saj.
Ministri i Tregtisë Kanada-SHBA-të, Dominic LeBlanc, njoftoi se Otava kërkon zgjatjen e marrëveshjes edhe për 16 vite të tjera, duke e cilësuar atë si “shumë të dobishme” për të tre vendet e rajonit.
Kërkesa vjen në një moment kur LeBlanc ndodhet në Uashington për takime me përfaqësuesin amerikan të tregtisë, Jamieson Greer, ndërsa negociatat mes dy vendeve kanë ecur më ngadalë krahasuar me ato mes SHBA-së dhe Meksikës.
Në letrën zyrtare, pala kanadeze thekson se marrëveshja, e njohur në Kanada si CUSMA, u jep vendeve të Amerikës së Veriut një avantazh të rëndësishëm në konkurrencën globale, por pranon gjithashtu se ka hapësira për përmirësim.
Ndërkohë, kryeministri Mark Carney ka kërkuar heqjen ose uljen e tarifave të vendosura nga administrata e Donald Trump për çelikun, aluminin, automobilat dhe drurin kanadez. Nga ana tjetër, zyrtarët amerikanë kanë sinjalizuar se Kanadaja mund të duhet të pranojë një pjesë të këtyre tarifave.
Mosmarrëveshjet tregtare mes dy vendeve mbeten të forta. SHBA kërkon më shumë akses në tregun kanadez, veçanërisht në sektorin e qumështit, ndërsa ka kritikuar edhe vendimin e disa provincave kanadeze për të hequr alkoolin amerikan nga tregu si kundërpërgjigje ndaj tarifave.
Në të njëjtën kohë, Uashingtoni po shtyn për rritjen e përmbajtjes amerikane në automjetet e prodhuara në Amerikën e Veriut. Sipas raportimeve, SHBA kërkon që të paktën 50% e komponentëve të makinave të jenë të prodhuara në vend.
Duke reaguar ndaj kritikave të brendshme për ekonominë, Carney pranoi se vendi po përballet me “dobësi”, por theksoi se qeveria synon ndërtimin e një ekonomie më të fortë dhe më të pavarur.
Nëse tre vendet nuk arrijnë një marrëveshje përpara 1 korrikut, USMCA do të duhet të rinovohet çdo vit deri në vitin 2036, duke shtuar pasigurinë për tregtinë në rajon.