Kina planifikon të ndërtojë rrugën e saj të parë të trashëgimisë kombëtare përgjatë Korridorit historikisht të rëndësishëm Hexi, i cili ndodhet në Kinën veriperëndimore, brenda dhjetë viteve të ardhshme. Kjo është pjesë e qëllimit të vendit për të forcuar mbrojtjen, trashëgiminë dhe shfrytëzimin e trashëgimisë kulturore dhe natyrore, shkruan “Xinhua”.
Të martën, plani i zbatimit për ndërtimin e një rruge të trashëgimisë kombëtare përgjatë Korridorit Hexi u publikua në një konferencë shtypi të mbajtur në provincën Gansu të Kinës veriperëndimore.
Sipas He Xiaozu, kreut të Departamentit provincial të Kulturës dhe Turizmit, Gansu do të zbatojë një sërë projektesh të përqendruara në mbrojtjen dhe shfrytëzimin e trashëgimisë, ndërtimin e infrastrukturës, planifikimin e industrisë së turizmit dhe shkëmbimet dhe bashkëpunimin ndërkombëtar.
Këto projekte do të përfshijnë gjithsej 52 trashëgimi kulturore dhe natyrore përfaqësuese dhe 20 projekte të trashëgimisë kulturore jomateriale në nivel kombëtar përgjatë Korridorit Hexi.
Rreth 610 milionë juanë (84.9 milionë dollarë amerikanë) do të investohet për të nxitur zbatimin e 120 detyrave specifike që lidhen me ndërtimin e rrugës.
Korridori Hexi, pjesë e Rrugës së lashtë të Mëndafshit dhe që shtrihet në një distancë prej gati 1000 kilometrash në Gansu, është vendndodhja e pesë e Vendeve të Trashëgimisë Botërore të UNESCO-s dhe 53 shpellave.
“Rruga do të ndërtohet duke iu përmbajtur parimit të ndërhyrjes minimale. Ajo do të bëhet një platformë e rëndësishme për Kinën për të ndarë arritjet kulturore me botën dhe për të promovuar shkëmbimet dhe mësimin e ndërsjellë midis qytetërimeve”,- tha Qiu Jian, kreu i Zyrës së Trashëgimisë Kulturore të provincës Gansu.