Maqedonia e Veriut është e përgatitur për sezonin e ardhshëm të ngrohjes dhe ka rezerva të mjaftueshme të energjensëve, edhe për rritjen e konsumit, siguron Kryeministri Hristijan Mickoski. Masat për uljen e akcizës dhe TVSH-së pritet të krijojnë mungesë të të hyrave në buxhet. Sipas Mickoskit, vetëm nga akciza parashikohet një mungesë prej rreth 5 miliardë denarësh, ndërsa së bashku me uljen e TVSH-së, shuma mund të arrijë në 7 deri në 8 miliardë denarë. Për këtë arsye, kryeministri paralajmëroi një rishikim të ri të buxhetit, duke theksuar se prioritet mbetet mbrojtja e standardit të qytetarëve.
“Kemi sasi edhe për konsumin e rritur dhe për sasitë e rritura që përdorin qytetarët e vendeve fqinje. Në përgjithësi, nuk pres ndonjë sfidë më të madhe gjatë sezonit të ngrohjes. Ajo që mbetet sfidë për ne, sepse të gjitha masat kanë koston e tyre, është se me shumë gjasë do të duhet të bëjmë edhe një rishikim të buxhetit, pasi vetëm në bazë të akcizës, vlerësimet janë se do të mungojnë rreth 5 miliardë denarë”, tha kryeministri i vendit, Hristijan Mickoski.
Bazuar në lëvizjet në bursë, kryeministri pret që Komisioni Rregullator për Energjetikë javën e ardhshme të marrë vendim për uljen e çmimeve të naftës dhe benzinës. Ndërkohë, Qeveria po negocion me kompaninë “OKTA” për sigurimin e një zbritjeje shtesë.
“Në mediat sociale individë të caktuar debatojnë me mua, nëse jemi të parët ose të katërtit a të pestit e kështu me radhë, të jem më preciz jemi një nga shtetet me çmimin më të ulët të karburantit në rajon, e ndoshta edhe në Evropë. Kjo mundëson paqe sociale dhe një normë të kontrolluar të inflacionit, e cila në këtë moment është 50 për qind më e ulët se mesatarja në BE”, u shpreh Mickoski.
Sipas kryeministrit, aktivitetet e riparimit të blloqeve termike në TEC “Manastir” dhe “Osllome” janë në fazën përfundimtare ose do të përfundojnë deri në fund të muajit. Potenciali hidroenergjetik aktualisht është në nivel të kënaqshëm. Si sfidë kryesore gjatë sezonit të ngrohjes, për të cilin pret që të fillojë plotësisht në gjysmën e dytë të nëntorit, Mickoski e veçoi ndotjen e ajrit për shkak të përdorimit të lëndëve djegëse joekologjike për ngrohje.