Koha kur Evropa mund t’ia linte në dorë mbrojtjen dhe sigurinë e saj Shteteve të Bashkuara ka marrë fund, vlerësuan sekretari i përgjithshëm i NATO-s, Mark Rutte, dhe presidentja e Komisioni Evropian, Ursula von der Leyen, në një artikull të përbashkët për revistën The Economist.
Ata pranuan se Evropa, brenda NATO-s, për një kohë të gjatë është mbështetur tepër në kapacitetet ushtarake të Uashingtonit, por theksuan se realiteti i ashpër dhe rreziqet e botës së sotme i kanë dhënë fund kësaj qasjeje. Sipas tyre, aleatët duhet të përshpejtojnë zhvillimin e industrisë së tyre të mbrojtjes për të qenë të përgatitur për një konflikt të mundshëm.
Në artikull thuhet se kapacitetet aktuale prodhuese të Evropës nuk arrijnë të përmbushin kërkesën në rritje. Ndihma ushtarake që Perëndimi i dërgon Ukrainës, si dhe zhvillimet e konfliktit në Lindjen e Mesme, kanë ushtruar presion të madh mbi rezervat ushtarake të vendeve anëtare, veçanërisht për interceptorët e mbrojtjes ajrore dhe sistemet kundër dronëve.
Si arsye kryesore për armatosjen urgjente, Rutte dhe Von der Leyen përmendin forcimin e kapaciteteve mbrojtëse të Rusia, Kina, Irani dhe Koreja e Veriut.
Ata theksojnë se Moska investon më shumë se 40 për qind të buxhetit shtetëror në mbrojtje dhe prodhon pajisje ushtarake gjatë gjithë kohës, ndaj industria ushtarake perëndimore duhet të reagojë më shpejt dhe në një shkallë shumë më të madhe se deri më tani.