Një avion privat i tipit Cessna Citation Latitude (C68A) doli nga pista gjatë uljes në Aeroportin Ndërkombëtar të Misratës, në Libi, më 14 shtator, dhe më pas u përfshi nga flakët.
Në bord ndodheshin tre anëtarë të ekuipazhit — kapiteni, ndihmëspiloti dhe një stjuardesë — ndërsa nuk kishte pasagjerë. Të tre i shpëtuan incidentit pa lëndime, sipas informacioneve të publikuara nga autoritetet dhe mediat lokale.
Prokuroria Publike e Libisë njoftoi se ka përfunduar fazën e parë të hetimeve dhe ka urdhëruar ndalimin paraprak të kapitenit dhe ndihmëspilotit. Sipas prokurorisë, hetuesit i kanë përballur ata me prova që, sipas dyshimeve paraprake, kishin operuar avionin nën ndikimin e alkoolit dhe nuk kishin respektuar rregullat e sigurisë ajrore.
Megjithatë, kompania operuese BKNJET e ka kundërshtuar këtë pretendim. Ajo deklaroi se pilotët iu nënshtruan kontrolleve shëndetësore pas incidentit dhe se nuk kishte marrë prova të dokumentuara që vërtetonin praninë e alkoolit.
Paralelisht, Ministria e Transportit e Libisë ka ngritur një komision teknik për të përcaktuar shkaqet e daljes së avionit nga pista dhe të zjarrit. Hetimet vijojnë./Alsat.mk
The post Avioni privat përfshihet nga flakët pas uljes në Libi, pilotët nën hetim për dyshime se fluturuan nën ndikimin e alkoolit appeared first on Alsat.