Ministri i Jashtëm i Turqisë, Hakan Fidan, deklaroi se siguria evropiane nuk mund të reduktohet vetëm te Bashkimi Evropian (BE), por kërkon një qasje më të gjerë, duke theksuar rolin qendror të Turqisë në arkitekturën e sigurisë së kontinentit, raportoi Anadolu.
Duke folur në aktivitetin me temë “Siguria evropiane pas Samitit në Ankara: Forcimi i bashkëpunimit ndërmjet aleatëve të NATO-s në Evropë”, të organizuar në Ankara nga Qendra për Studime Strategjike (SAM) e Ministrisë së Jashtme të Turqisë dhe Chatham House, Fidan tha se NATO duhet të fokusohet në ndërtimin e kapaciteteve strategjike afatgjata dhe jo vetëm në reagimin ndaj kërcënimeve ekzistuese.
Ai u shpreh se, pavarësisht tensioneve mes Shteteve të Bashkuara dhe Evropës, nuk pret që ato të shndërrohen në një krizë të pakontrollueshme gjatë samitit të NATO-s dhe se pjesëmarrja e presidentit amerikan Donald Trump do të jetë e rëndësishme për menaxhimin e dallimeve.
Fidan theksoi se siguria evropiane kërkon një qasje gjithëpërfshirëse përtej BE-së, duke nënvizuar rolin qendror të Turqisë në këtë proces.
Ai rikonfirmoi mbështetjen e Turqisë për sovranitetin dhe integritetin territorial të Ukrainës, duke shtuar se ruajtja e kontakteve diplomatike dhe dialogut me Rusinë mbetet e domosdoshme për sigurinë evropiane.
Sipas tij, kapaciteti i industrisë së mbrojtjes së NATO-s nuk duhet të shihet vetëm nga perspektiva e BE-së. Ai e përshkroi Turqinë dhe Mbretërinë e Bashkuar, të dyja me industri të fuqishme të mbrojtjes, si partnerë natyrorë dhe thelbësorë në bashkëpunimin evropian në fushën e mbrojtjes.
Fidan tha gjithashtu se Evropa nuk duhet t’i konsiderojë thirrjet e SHBA-së për një ndarje më të madhe të barrës si presion psikologjik apo kërcënim, por duhet të marrë më shumë përgjegjësi për mbrojtjen e saj.
“Forcimi i kapaciteteve mbrojtëse të Evropës është thelbësor jo vetëm për të ardhmen e NATO-s, por edhe për qëndrueshmërinë strategjike të Evropës”, tha ai, duke shtuar se nuk pritet që fajësimet mes Evropës dhe SHBA-së të dominojnë samitin në Ankara.
Ministri turk theksoi se pjesa më e vështirë e përgatitjeve për samitin ishte bindja e Donald Trumpit për të marrë pjesë, ndërsa shtoi se “pjesa më e vështirë tashmë është tejkaluar”, pasi pjesëmarrja e tij është siguruar.