Barcelona e Hansi Flick e ka ndërtuar identitetin mbi lojën sulmuese dhe dëshirën për të kërkuar gjithmonë fitoren. Megjithatë, kjo filozofi po i kushton pikë të rëndësishme. Humbja 2-1 ndaj Real Madridit në “El Clásico”, pas golit të Mbappé në kundërsulm, është shembulli më i fundit. Madrilenët tashmë e kanë sërish fatin e titullit në duart e tyre.
Edhe në Paris, Barcelona nuk arriti ta ruante barazimin 2-2 ndaj PSG-së, duke pësuar dy gola në fund dhe humbur 4-2. Problemi është përsëritur në disa ndeshje vendimtare. Në dhjetor 2024, Atlético Madridi fitoi 2-1 me golin e Alexander Sørloth në minutën e 96-të. Në shkurt 2025, Atlético barazoi 4-4 në Kupë me dy gola në minutat e fundit. Po atë vit, Interi barazoi 3-3 në minutën e 93-të në gjysmëfinalen e Champions-it, përpara se të fitonte 4-3 pas shtesës, duke i mohuar Barcelonës finalen.
Në sezonin 2025-2026, Barcelona pësoi sërish nga PSG-ja, duke humbur 2-1 pas golit të Gonçalo Ramos në minutën e 90-të. Ndërsa ndaj Atlético Madridit, në çerekfinalet e Champions-it, mbrojtja e avancuar katalanase kontribuoi në përjashtimin e Pau Cubarsí me karton të kuq dhe humbjen 2-1 në ndeshjen e parë. Barcelona u eliminua pas dy sfidave.
Rodri e përmblodhi qartë problemin: “Skuadra e demonstron gjithmonë potencialin e saj sulmues, por po lejojmë shumë raste dhe pikërisht këtu mund të përmirësohemi”. Barcelona duhet të mësojë të menaxhojë avantazhet, të mbrohet më mirë dhe të fitojë edhe ndeshjet e vështira, kur loja sulmuese nuk funksionon. Për ta fituar Champions-in, nuk mjafton vetëm të luash bukur. Duhet të dish edhe të vuash.
The post Gabimi i përsëritur, që Barcelona e Flick nuk ka arritur ta korrigjojë dhe po i kushton shtrenjtë appeared first on Telesport.