Italia ka bërë padyshim një hap të madh përpara, me ligjin e fundit në mbrojtje të arbitrave të futbollit. Dhuna ndaj arbitrave të futbollit në Itali futet në kodin penal, duke u barazuar me dhunën ndaj një zyrtari publik.
Goditja e një arbitri në fushë, tani është e barabartë me plagosjen ose dhunimin e një polici ose dhunimin e një zyrtari publik dhe dënohet nga dy deri në 5 vite burg, madje mund të dënohet edhe më shumë deri në 10 ose 15 vite, nëse arbitri i dhunuar ka pësuar lëndime të rënda.
Ky ligj historik në mbrojtje të arbitrave është kërkuar prej kohësh nga Shoqata Italiane e Arbitrave, kreu i saj, Antonio Zappi, nuk e fsheh gëzimin e madh pas miratimit të këtij ligji nga Këshilli i Ministrave.
“Jam shumë i gëzuar dhe ndjej një emocion të madh për miratimin e këtij ligji historik. Mbrojtja e gjyqtarëve më në fund futet në kodin penal dhe është rezultat i muajve të tërë pune dhe përfshirjes së shumë “aktorëve”. Falënderoj Qeverinë për miratimin e këtij ligji si dhe të gjithë ata që e kanë mbështetur këtë ligj dhe kanë ndihmuar në bërjen realitet të nismës sonë”, tha Zappi.
The post Italia bën një hap përpara, miratohet ligji historik për arbitrat appeared first on Telesport.