-Në vitet e fundit, fjala qëndrueshmëri është bërë një nga termat më të përdorur në ekonominë botërore. Por, pas këtij termi nuk fshihet vetëm një rregullore e re, një standard i ri apo një proces i ri administrativ. Pas tij qëndron një ndryshim thelbësor në mënyrën se si funksionon bota. Sot, nuk janë të suksesshme vetëm kompanitë që prodhojnë një produkt cilësor. Të suksesshme janë ato që dinë të menaxhojnë me përgjegjësi burimet, të investojnë te njerëzit e tyre dhe të krijojnë besim te investitorët, partnerët dhe konsumatorët, tha sot kryeministri Hristijan Mickoski në fjalimin e tij në ngjarjen “Shndërrimi i qëndrueshmërisë në konkurrueshmëri: Ndërtimi i bizneseve rezistente në një botë të pasigurt”.
Sipas tij, kur flitet për një vizion kombëtar të zhvillimit të qëndrueshëm, nuk bëhet fjalë vetëm për ekologjinë, politikat e gjelbra apo harmonizimin me standardet evropiane.
“Po flasim për një model të zhvillimit ekonomik që krijon siguri. Për një shtet rezistent ndaj krizave. Për institucione që krijojnë besim. Për një ekonomi që është e aftë të konkurrojë në tregjet më të zhvilluara. Për një ekonomi që krijon mundësi që të rinjtë të qëndrojnë këtu, të themelojnë kompani, të investojnë dhe ta ndërtojnë të ardhmen e tyre në vend. Sot, bota është dukshëm ndryshe nga ajo që njihnim para disa vitesh. Luftërat, kriza energjetike, ndërprerjet në zinxhirët e furnizimit, presionet inflacioniste dhe ndarjet e reja gjeopolitike treguan se stabiliteti ekonomik nuk mund të merret më si i mirëqenë”, theksoi Mickoski.
Në kushte të tilla, sipas tij, qëndrueshmëria nuk është më një zgjedhje, por një parakusht për konkurrueshmëri.
“Kompanitë që do të përshtaten me kohë do të kenë qasje në tregje të reja, kapital të ri dhe investitorë të rinj. Ato që do të investojnë në efikasitet energjetik, digjitalizim, inovacion dhe dije do të jenë kompanitë që do ta udhëheqin zhvillimin ekonomik në dekadën e ardhshme”, porositi kryeministri.
Prandaj, shtoi Mickoski, Qeveria e sheh veten si një partner aktiv të biznesit.
“Detyrimi ynë është të krijojmë një klimë të parashikueshme biznesi, institucione efikase, infrastrukturë moderne, arsim cilësor dhe një kornizë rregullatore që nuk i pengon investimet, por i nxit ato. Dhe kur flasim për rezultate, nuk flasim vetëm për shifra. Pas çdo treguesi ekonomik qëndrojnë mijëra histori njerëzore. Qëndron një vend i ri pune. Një fabrikë e re. Një pagë më e lartë. Një familje që më lehtë i përballon shpenzimet mujore. Një i ri që ka vendosur ta ndërtojë të ardhmen e tij këtu”, tha Mickoski.
Ai shtoi se është e rëndësishme të shihen faktet.
“Nëse shohim prapa, do të vërejmë se në periudhën 2017–2023 rritja mesatare ekonomike ishte rreth 1.8 për qind. Sot flasim për një dinamikë krejtësisht tjetër. Në vitin 2024 ekonomia u rrit me 3 për qind, në vitin 2025 me 3.5 për qind, ndërsa edhe gjatë këtij viti po ruajmë një trajektore të qëndrueshme pozitive të rritjes. Kjo nuk është rastësi. Është rezultat i rikthimit të besimit, stabilizimit të financave publike, mbështetjes aktive për investimet dhe bashkëpunimit me sektorin privat. Njëkohësisht, arritëm të përballemi me një nga sfidat më të mëdha ekonomike me të cilat u përball Evropa. Inflacioni, i cili në vitin 2022 arriti në 14.2 për qind dhe ndikoi seriozisht në standardin e jetesës së qytetarëve, sot është dukshëm më i ulët. Në maj të këtij viti ai ishte 4.8 për qind, në një kohë kur bota ende përballet me pasiguri dhe pasojat e krizës globale energjetike dhe ekonomike”, theksoi kryeministri.
Megjithatë, sipas tij, treguesi më i rëndësishëm ekonomik nuk është vetëm rritja e Prodhimit të Brendshëm Bruto.
“Treguesi më i rëndësishëm është nëse njerëzit jetojnë më mirë.”
Forumi i sotëm u organizua nga zyra e Kombeve të Bashkuara në bashkëpunim me Odën Ekonomike dhe Ministrinë e Punëve të Jashtme dhe Tregtisë së Jashtme. Përveç kryeministrit, në forum u drejtuan edhe ministri i Punëve të Jashtme dhe Tregtisë së Jashtme, Timço Mucunski, ambasadori i Bashkimit Evropian, Mihalis Rokas, kryetari i Odës Ekonomike, Branko Azeski, si dhe koordinatorja e përhershme e OKB-së në vend, Rita Columbia.