Nga 1 nëntori, në sistemin e pagesave vendore do të hyjë në fuqi një ndryshim që në shikim të parë mund të duket sikur po ndryshojnë numrat e llogarive bankare. Por për qytetarët, në thelb asgjë nuk ndryshon – llogaritë mbeten të njëjta, paratë mbeten në të njëjtin vend dhe nuk ka nevojë as për hapjen e një llogarie të re dhe as për të shkuar në bankë.
Ndryshimi është se gjatë pagesave, llogaria bankare do të përdoret në formatin IBAN. Kjo do të thotë se para numrit aktual të llogarisë do të shtohet shenja „MK07“.
Për shembull, nëse deri tani qytetari ka përdorur numrin e tij të llogarisë vendore, tash i njëjti numër në sistemin e pagesave do të shfaqet me „MK07“ përpara tij. Pra, nuk bëhet fjalë për një llogari të re, por për një mënyrë të re dhe të standardizuar të identifikimit të saj.
IBAN (International Bank Account Number) është format ndërkombëtarisht i standardizuar për identifikimin e llogarive bankare. Deri tani qytetarët e kanë hasur më së shumti gjatë transaksioneve me jashtë, ndërsa nga 1 nëntori do të përdoret edhe për pagesat vendore.
Qëllimi është që sistemi vendor i pagesave të harmonizohet me standardet evropiane dhe ndërkombëtare dhe që pagesat të përpunohen më thjeshtë dhe më efikas.
A duhet qytetarët të shkojnë në bankë?
Jo.
Futja e IBAN-it nuk kërkon që qytetarët të vizitojnë degën e bankës, të nënshkruajnë kontratë të re apo të hapin llogari të re.
Bankat do t’i përshtatin vetë sistemet e tyre për e-banking dhe mobile banking. Te disa banka tashmë është paralajmëruar se klienti do të mund të vazhdojë ta vendosë numrin e llogarisë si më parë, ndërsa sistemi automatikisht do ta shndërrojë atë në formatin IBAN.
Prandaj, qytetarët duhet vetëm të ndjekin udhëzimet konkrete të bankës së tyre, veçanërisht gjatë pagesave të para pas zbatimit të sistemit të ri.
A ndryshon qasja në paratë?
Jo.
Gjendja e llogarisë, paratë në të dhe e drejta për t’i përdorur ato nuk ndryshojnë.
Qytetarët do të vazhdojnë t’i përdorin llogaritë përmes mobile banking, e-banking, bankomatëve dhe degëve bankare.
Futja e IBAN-it nuk nënkupton bllokimin e llogarive, transferimin e parave apo nevojën për riaktivizimin e tyre.
Praktikisht, ndryshon vetëm mënyra se si llogaria identifikohet gjatë një transaksioni, jo vetë llogaria.
Çfarë do të ndodhë me urdhërpagesat?
Gjatë muajit nëntor do të fillojnë të përdoren edhe urdhërpagesa të reja të standardizuara.
Ato do t’i zëvendësojnë formularët aktualë PP10, PP30, PP40, PP50 dhe PP53, si në formë fizike ashtu edhe elektronike.
Ndryshim do të ketë edhe te kodet që tregojnë qëllimin e pagesës. Në vend të kodeve të deritanishme numerike do të përdoren shenja me katër karaktere.
Për shembull, do të ketë kode të veçanta për lloje të ndryshme të transaksioneve, si pagat, qiratë, energjia elektrike dhe pagesa të tjera.
Për qytetarët që paguajnë në sportel, formularët e rinj do të jenë në dispozicion në banka. Ndërsa te mobile banking dhe e-banking, ndryshimet do të jenë të integruara në sistemet e bankave.
Çfarë duhet të mbajnë mend qytetarët?
Më e rëndësishmja është se nga 1 nëntori nuk marrin një llogari të re bankare.
Numri ekzistues mbetet, por gjatë pagesave do të përdoret në formatin IBAN, me „MK07“ përpara tij.
Nuk ka nevojë të tërhiqni paratë nga llogaria, të hapni llogari të reja apo të shkoni në bankë vetëm për shkak të këtij ndryshimi.
Përshtatje më të mëdha teknike mund të nevojiten te kompanitë që përdorin programe të kontabilitetit, urdhërpagesa automatike dhe sisteme për pagesa masive. Për këto hapa, bankat do t’i informojnë kompanitë në mënyrë konkrete.
Ndryshimi është kryesisht teknik – për qytetarin llogaria dhe paratë mbeten të njëjta, ndërsa sistemi bankar kalon në një mënyrë të unifikuar të identifikimit dhe përpunimit të pagesave.
The post Nga e hëna numra të rinj për llogaritë bankare të të gjithë qytetarëve – gjithçka që duhet të dini first appeared on .