Harry Kane fitoi “Topin e Artë” në një nga garat më të ngushta të viteve të fundit, por renditja përfundimtare e 30 finalistëve shkaktoi polemika. Jude Bellingham u rendit i 11-ti, jashtë dhjetëshes së parë, pavarësisht paraqitjeve të shkëlqyera në Kupën e Botës dhe 7 golave të shënuar. Anglezi i Real Madridit, i treti në vitin 2024, pritej të vlerësohej më shumë.
Vitinha, një nga shtyllat e PSG-së së Luis Enriques, përfundoi i 14-ti. Portugezi regjistroi 7 gola dhe 10 asistime sezonin e kaluar, por paraqitja e dobët e Portugalisë në Botëror ndikoi në votimin e gazetarëve. Pau Cubarsí u rendit i 12-ti. Mbrojtësi i Barcelonës dhe Spanjës shkëlqeu në Botëror, por mbeti jashtë dhjetëshes së parë, duke shkaktuar reagime te tifozët.
Edhe Fabián Ruiz, fitues i Champions-it dhe Botërorit, përfundoi vetëm i dhjeti, pas Erling Haaland. Ndërkohë, Khvicha Kvaratskhelia, vendimtar në sukseset e PSG-së dhe lojtari më i mirë i Champions-it të kaluar, u rendit i gjashti. Ousmane Dembélé përfundoi i shtati.
Pavarësisht se PSG-ja kishte 10 përfaqësues mes kandidatëve, lojtarët e saj u vlerësuan më pak nga sa pritej. Edhe Michael Olise, ylli i Bayernit, përfundoi pas Haaland, ndonëse zhvilloi një sezon të shkëlqyer.
Polemika pati edhe për përfshirjen e Sadio Mané dhe Quiñones, ndërsa emra si Raphinha, Pedri, Désiré Doué, Mikel Oyarzabal dhe Unai Simón munguan në listën e kandidatëve. Veçanërisht e diskutueshme ishte mungesa e Raphinha, pas një sezoni të shkëlqyer me Barcelonën.
The post Polemikat e “Topit të Artë” 2026. Kane fitues, por disa yje ndjenë shije të hidhur appeared first on Telesport.