Aktori amerikan Richard Gere, gjatë një tribune publike dje në Oslo, e quajti presidentin amerikan Donald Trump “maniak që po shkatërron gjithçka që është e mirë”.
“Po e përjetojmë momentin më të errët që kam parë ndonjëherë në këtë planet. Kush do ta kishte menduar se Amerika mund të përjetonte një kthesë të tillë? Kush do ta kishte menduar se një maniak i tillë mund të bëhej president i SHBA-së?”, tha aktori 76-vjeçar.
Gere qëndroi në Norvegji me rastin e pjesëmarrjes në “Forumin për Lirinë në Oslo”, ku ndau çmimin ndërkombëtar “Vaclav Havel” për angazhim krijues disident, për artistin kinez Gao Zhen, i burgosur në vendin e tij, si dhe për disidentin Sai.
“Që nga dita e parë, ai njeri ka shkatërruar pothuajse gjithçka të mirë që ekzistonte në qeverinë amerikane dhe shoqërinë amerikane. Si ishte e mundur kjo? Sepse fjetëm. Nuk u kujdesëm. Nuk votuam. Nuk dëgjuam mjaftueshëm me vëmendje”, tha Gere, duke pranuar se as vetë nuk kishte bërë mjaftueshëm për të mobilizuar njerëzit rreth tij.
Aktori së fundmi kishte vizituar ish-kampin nazist të përqendrimit “Memoriali i ish-kampit të përqendrimit Dachau”. Ai paralajmëroi për rreziqet e apatisë shoqërore dhe për shenjat e autoritarizmit.
“Duhet t’i njohim shenjat e kësaj diktature të një përbindëshi dhe sa shpejt po forcohet. Duhet të qëndrojmë vigjilentë”, u shpreh Gere.