Prokuroria Themelore Publike në Shkup, në procedurë të shkurtuar, po ndjek penalisht një 46-vjeçar të dyshuar për vepra të rënda kundër sigurisë së njerëzve dhe pronës në komunikacion, sipas nenit 300 paragrafi 4, në lidhje me nenin 297 paragrafi 3 dhe paragrafi 1, si dhe për mosdhënie të ndihmës personit të lënduar në një aksident trafiku, sipas nenit 301 paragrafi 1 të Kodit Penal.
I dyshuari, më 7 gusht rreth mesditës, drejtonte një automjet “Seat Altea” në rrugën “Radishanska”. Në kryqëzimin me rrugën “18”, ku komunikacioni nuk është i rregulluar me shenja, ai është kthyer majtas pa u dhënë përparësi automjeteve që vinin nga drejtimi i kundërt. Në këtë mënyrë, i ka prerë rrugën një motoçiklete “Kawasaki”, e cila nga ana e kundërt e kryqëzimit po vazhdonte lëvizjen në të njëjtin drejtim.
Për të shmangur përplasjen e drejtpërdrejtë me automjetin, motoçiklisti ka devijuar majtas, duke kaluar në korsinë e dedikuar për automjetet që lëviznin në drejtim të kundërt.
Por, aty, me pjesën e përparme të motoçikletës është përplasur drejtpërdrejt me një automjet “Alfa Romeo” që vinte nga drejtimi i kundërt. Nga fuqia e përplasjes, motoçiklisti Nikola Makraçevski ka dalë nga motoçikleta dhe ka rënë në rrugë, duke pësuar lëndime të rënda trupore, nga të cilat ka ndërruar jetë. Drejtuesi i “Alfa Romeos” ka pësuar lëndime më të lehta.
I dyshuari, në vend që t’u ofronte ndihmë personave të lënduar, është larguar nga vendi i aksidentit.
Për të siguruar praninë e tij gjatë procedurës, prokurori publik ka propozuar caktimin e masave të kujdesit, përkatësisht ndalimin e largimit nga vendbanimi ose vendqëndrimi, detyrimin për t’u paraqitur në gjykatë, marrjen e përkohshme të pasaportës dhe heqjen e patentë-shoferit.