Një problem administrativ dhe teknik në sistemin e sigurimit shëndetësor ka lënë pa sigurim shëndetësor punonjës të Ministrisë së Punëve të Brendshme, ndërsa situata ka prekur edhe policë që kishin nevojë për trajtime serioze mjekësore.
Sipas raportimeve të „Sloboden Pechat“, disa punonjës të MPB-së, të cilët kërkuan shërbime shëndetësore, u përballën me një situatë alarmante: ose duhej t’i paguanin vetë shërbimet mjekësore, ose të prisnin derisa statusi i tyre të rregullohej përsëri në sistem.
Por shqetësimi më i madh lidhet me faktin se problemi preku edhe punonjës që kishin planifikuar kimioterapi, procedura diagnostikuese dhe analiza laboratorike. Sipas raportimeve, disa prej tyre u kthyen nga institucionet shëndetësore pa marrë shërbimin për të cilin kishin shkuar.
Problemi dyshohet se lidhet me të dhënat e një punonjësi të MPB-së, i cili ishte rikthyer në vendin e punës pas një vendimi gjyqësor. Burime nga Fondi i Sigurimeve Shëndetësore kanë bërë të ditur se kontributet për këtë punonjës duhej të regjistroheshin gjatë ditës, pas së cilës sigurimi shëndetësor i punonjësve pritej të aktivizohej përsëri.
Ky nuk është rasti i parë i një problemi të tillë.
Një situatë e ngjashme ishte raportuar edhe në fund të qershorit, kur pas rikthimit në punë të një polici me vendim gjykate, të dhënat e pasakta në sistem shkaktuan ndërprerje të sigurimit shëndetësor për një numër të madh punonjësish të MPB-së.
Sindikata e Pavarur e Policisë ka reaguar ashpër, duke e cilësuar të papranueshme që policët, të cilët çdo ditë janë në shërbim të qytetarëve, të mbeten pa sigurim shëndetësor për shkak të problemeve administrative.
Sindikata ka kërkuar ndërhyrje urgjente nga ministri i Punëve të Brendshme, Pançe Toshkovski, si dhe një zgjidhje të përhershme që një problem i vetëm administrativ të mos shkaktojë më pasoja për qindra apo mijëra punonjës.
Rasti ngre edhe një pyetje serioze: si është e mundur që një problem me të dhënat e një punonjësi të ndikojë në sigurimin shëndetësor të punonjësve të tjerë – madje edhe të pacientëve që kanë nevojë për trajtime onkologjike?
Në momentin e publikimit të informacionit, nuk kishte një njoftim zyrtar nga Ministria e Punëve të Brendshme që të sqaronte nëse sigurimi shëndetësor i të gjithë punonjësve të prekur ishte rikthyer plotësisht.