Jordan Lukaku ka folur për periudhën e vështirë që po kalon vëllai i tij, Romelu, duke e cilësuar si “ndoshta vitin më të vështirë të karrierës së tij, si në aspektin profesional, ashtu edhe në atë personal”.
Sipas Jordan, pas dëmtimit të Romelu në fillim të sezonit, Napoli transferoi një tjetër sulmues, Rasmus Højlund, ndërsa trajneri i komunikoi se “nga ai moment nuk do të ishte më titullar”. Në kampionat, Lukaku luajti vetëm 40 minuta dhe shënoi vetëm ndaj Veronës.
Ai u shpreh i habitur edhe nga mënyra se si u trajtua një futbollist që kishte ndihmuar Napolin të fitonte kampionatin, duke arritur shifra dyshifrore si për gola, ashtu edhe për asistime. Sipas tij, një nga arsyet mund të ketë qenë prishja e marrëdhënies me Antonio Conten.
Jordan foli edhe për humbjen e babait të tyre: “Kur babai vdiq, Napoli i kërkoi Romelu të kthehej në Itali sa më shpejt, pa treguar asnjë dhembshuri”.
Në fund ai paralajmëroi: “Romelu nuk ka pasur asnjë moment pushimi mendor. Pas Botërorit, kur të mbetet vetëm me mendimet e tij, gjithçka mund të shpërthejë dhe ndoshta kjo do t’i bëjë edhe mirë”.
The post Vëllai i Lukakut sulmon Napolin dhe Conten: Romelu u trajtua pa asnjë dhembshuri appeared first on Telesport.