Ministrat e mbrojtjes nga vendet nordike dhe baltike, së bashku me ministrin e jashtëm të Islandës, njoftuan sot një kontribut të përbashkët prej 500 milionë dollarësh për nevojat ushtarake të Ukrainës.
Pas një takimi në Helsinki, ministrat e Danimarkës, Estonisë, Finlandës, Letonisë, Lituanisë, Norvegjisë dhe Suedisë, së bashku me ministrin e jashtëm të Islandës, lëshuan një deklaratë të përbashkët duke theksuar se siguria e Ukrainës është “themelore për sigurinë evropiane”, raporton KosovaPress.
“Ne jemi të bashkuar në ndjekjen e një paqeje të qëndrueshme dhe të drejtë, në respekt të plotë të sovranitetit të Ukrainës dhe aspiratave legjitime të popullit të saj”, thanë ministrat.
Vendet janë të përkushtuara për të ofruar mbështetje ushtarake afatgjatë, të parashikueshme dhe të koordinuar, duke përfshirë zhvillimin e kapaciteteve, bashkëpunimin mbrojtës-industrial dhe forcimin e aftësisë së Ukrainës për të penguar agresionin e ardhshëm rus.
Si pjesë e kësaj përpjekjeje, grupi njoftoi një kontribut prej 500 milionë dollarësh për iniciativën e Listës së Kërkesave të Prioritizuara për Ukrainën (PURL), një mekanizëm që mundëson blerjen e pajisjeve kritike mbrojtëse të prodhuara në SHBA për Ukrainën, transmeton Anadollu.
Ministrat thanë se paketa do të “kontribuojë drejtpërdrejt në rezistencën dhe mbrojtjen e Ukrainës kundër agresionit rus”, duke shtuar se iniciativa është një nga shumë mënyrat se si vendet nordike dhe baltike vazhdojnë të mbështesin Kievin.
The post Vendet nordike dhe baltike premtojnë 500 milionë dollarë mbështetje të re ushtarake për Ukrainën appeared first on Alsat.