Drejtoria e Policisë Financiare ka ngritur kallëzim penal në Prokurorinë Themelore Publike – Shkup kundër tetë personave – ish-funksionarë dhe punonjës në Komunën e Sarajit dhe Qytetin e Shkupit, si dhe një inxhinier mbikëqyrës, nën dyshimin për keqpërdorim të detyrës dhe autoritetit zyrtar, punë të pakujdesshme në shërbim dhe falsifikim ose shkatërrim të librave afaristë.
Siç informon Drejtoria, është ngritur një kallëzim penal kundër personave B.B. në cilësinë e ish-kryetarit të komunës, S.Sh. dhe Q.K. në cilësinë e ish-sekretarëve në Komunën e Sarajit, A.S. dhe K.A. në cilësinë e udhëheqësve të departamentit të planifikimit urban në Komunën e Sarajit, A.Sh. në cilësinë e bashkëpunëtorit të ri në Komunën e Sarajit, I.B.S. në cilësinë e udhëheqësit të departamentit për planifikim dhe zhvillim hapësinor në Qytetin e Shkupit dhe Lj.T. në cilësinë e inxhinierit mbikëqyrës, për veprat penale si në vijim: “Keqpërdorim i pozitës dhe autoritetit zyrtar” sipas nenit 353 të Kodit Penal të Republikës së Maqedonisë, “Kryerje e pakujdesshme e detyrave zyrtare” sipas nenit 353-c të Kodit Penal të Republikës së Maqedonisë dhe “Falsifikim ose shkatërrim i librave afaristë” sipas nenit 280 të Kodit Penal të Republikës së Maqedonisë.
“Ekzistojnë baza për dyshim se të raportuarit, punonjës të Komunës së Sarajit, megjithëse ishin në dijeni se nuk kishte plan të detajuar urbanistik të miratuar për parcelën kadastrale KP 10405/6 KO Saraj, duke tejkaluar autorizimet e tyre zyrtare, kanë përgatitur dhe miratuar një ekstrakt nga plani dhe një leje ndërtimi me përmbajtje të rreme, si dhe llogaritje për kompensim për zhvillimin e tokës ndërtimore, në kundërshtim me rregulloret ligjore, dhe inxhinieri mbikëqyrës ka kryer një inspektim teknik të objektit dhe ka përgatitur një raport përfundimtar me përmbajtje të rreme”, njoftojnë nga Drejtoria e Policisë Financiare.
Në këtë mënyrë, thuhet në njoftim, të raportuarit, duke keqpërdorur detyrën dhe autorizimet e tyre zyrtare, si dhe duke kryer detyrat e tyre në mënyrë të pakujdesshme, i kanë mundësuar personit juridik “Azra Idriz” SHPKNJ fshati Glumovo, Shkup – Saraj të përfitojë dobi pasurore të kundërligjshme në shumë prej 108.638.840 denarësh.